№84 мектеп-лицейінің 9 сынып оқушысы бұл білім бәйгесіне химия пәнінен қатысыпты. Оның жетекшісі Эльмира Қажекенованың айтуынша, олимпиадаға жүйелі дайындық 7 сыныптан басталған.
«Алидан сол кездің өзінде-ақ мектеп бағдарламасындағы кітаптарды толық оқып тауысты. Өткен оқу жылдарындағы олимпиада тапсырмаларын талдап дайындалды. Нәтижесінде, 7-8 сыныптарда химия пәнінен аудандық, облыстық, кейін республикалық пәндік олимпиадаларға қатысып жүлделі орындарға ие болды. Ал 9 сыныпқа көшкенде жоғары оқу орындарының оқулықтарына ауыз салды. «Daryn.online», «Ustudy.kz», «Quizlet» сынды платформалармен де біршама дайындалдық. Еткен еңбек еш кеткен жоқ. Мінекей, шәкіртіміз таланттар тайталасында топ жарып келді. Біз мұнымен тоқтамаймыз. Алиданның алар асуы әлі алда. Республикалық пәндік олимпиададан оза шауып, «ICho» халықаралық химия олимпиадасында алтыннан алқа тағу – ендігі мақсатымыз», дейді Э.Қажекенова.
Жыл сайын дәстүрлі түрде өтетін халықаралық «COPERNICUS» олимпиадасы биыл алтыншы мәрте ұйымдастырылып отыр. Бұл жарыста жер-жерден келген жоғары сынып оқушылары жаратылыстану бағытындағы пәндер бойынша бақ сынайды. Яғни осынау кәделі конкурс жас өрендерді ғылым жолына жетелейді.
Анасының айтуынша, Алидан кішкентай кезінен-ақ әртүрлі нәрселердің қалай, неден жасалатынын зерттеуді ұнататын болған.
«Баламның жеңісінің артында үлкен еңбек жатыр. Әрине бәрі пәнге деген қызығушылықтан басталады. Ұстаздарының да еңбегі зор. Біз ата-ана ретінде қолдау көрсетіп отырдық. Сонымен қатар тілді жақсы меңгеруіне жағдай жасадық. Алидан ағылшын тілінен бөлек, араб, түрік тілдерін де тәуір біледі. Баламыз болашақта ғылыммен айналысқысы келеді», дейді анасы ағынан жарылып.
