Мұнда қазір 2 көппәтерлі тұрғын үйді қалпына келтіру жұмыстары жүргізіліп жатыр. Жөндеу жұмыстарын «Кентавр-Құрылыс» ЖШС атқаруда, аяқталу мерзімі сәуір айына жоспарланған. Жоспарда, кезекте тағы 5 үй бар. Баспана кезегінде тұрғандар саны – 236 адам. Олардың арасында мемлекеттік қызметкерлер, көпбалалы отбасылар мен жетім балалар бар.
Абай облысының әкімі Нұрлан Ұранхаев Курчатов қаласына жасаған жұмыс сапары барысында бірнеше әлеуметтік маңызы бар нысанды аралап, құрылыс, қалпына келтіру жұмыстарын тексерді. Аймақ басшысының алдымен балалар мен жасөспірімдер шығармашылығы үйінің ғимаратын аралады. Қала әкімі Болат Әбдіралиев жобаның атқарылуы мен аяқталуы туралы баяндады. Жаңа ғимарат бұған дейін қараусыз тұрған еді. Бүгінде балалар мен жасөспірімдердің шығармашылық үйінде роботтехника, тігіншілік, би, қыш өнері, ойын техникасы сынды үйірмелерден бөлек, акт залы бар. Қажетті құрал-жабдық алынған. Көктемде ғимарат ауласын абаттандыру жұмысы басталады. Аймақ басшысы жастар бас қосатын тағы бір ғимаратты күрделі жөндеуден өткізу керектігін айтты. Қала әкімінің өтінішіне орай, облыстық білім басқармасының басшысы Нұржан Ахметқалиевке шаһардағы мектеп ауласына спорт алаңын салу жөнінде тапсырма берді. Өңір басшысы сондай-ақ дене шынықтыру-сауықтыру кешенінің құрылысы алаңына да барды. Жаңа спорт кешені заманауи стандарттарға сай, барлық жастағы адамдарға, соның ішінде мүгедектігі бар азаматтарға да қолжетімді болады.
Қаланы жылумен қамту мәселелері де назардан тыс қалған жоқ. №1 қазандық 30 көпқабатты тұрғын үйді жылумен қамтамасыз етеді. Өткен жылы қазандықтағы 4 пешке ағымдағы жөндеу жүргізіліп, 2 ескі пеш ауыстырылды, қосымша 2 пеш орнатылды. Жалпы Курчатов қаласында 4 қазандық бар. Олар 79 тұрғын үйге, 20 мемлекеттік мекемеге, 24 заңды тұлғаға қызмет көрсетеді.
Аймақ басшысы қалпына келтірілетін үйлердің сапасына ерекше мән беріп, заманауи үлгіде болуына көңіл аудару керектігін айтты. «Бұл нысандардың әрқайсысы Курчатов қаласының дамуында маңызды рөл атқарады. Тұрғындардың спортпен шұғылданып, шығармашылықпен айналысуына барынша жағдай жасауға тиіспіз. Ол үшін жұмысты белгіленген мерзімде аяқтауымыз керек», деді облыс әкімі.
Абай облысы,
Курчатов қаласы
