Әрине, бұл жетістікке жету жас жауынгерге оңай болған жоқ. Өзінің айтуынша, ол бала кезінен спортқа қызығушылық танытыпты. Спорт оның әскери қызметтегі жетістіктеріне негіз қалады десек, болады. Бұған дейін де жас сарбаз жыл бойы ұйымдастырылатын әскери-спорттық жарыстарға белсене қатысып, үшсайыс пен көпсайыстарда, түрлі турнирлерде жүлдегер мен жеңімпаз атанып жүрді. Асылбектің өміріндегі басты жетістігі қоян-қолтық ұрыс бойынша бүкіл армия жарыстарында бақ сынап, өзінің жауынгерлік қарым-қабілеті мен жоғары кәсібилігін көрсетуі болды.
Оның қол жеткізген жүлделерінің ішінде «Қарулы күштер взводының үздік сержанты–2024» аталымы бойынша алған марапатының орны ерекше. Ол бүкіл армия арасында өткен сол әскери-спорттық байқауда жүзден жүйрік шығып жүлделі орынды жеңіп алған еді. Асылбекпен бірге қызмет атқаратын әріптестері мен әскери жауапты мамандар оның бойында көшбасшылық қасиет барын айтты, сондай-ақ ең қиын жағдайларда салқынқандылық танытып, дұрыс шешім қабылдай алатын қабілет пен мінезін де мақтады. Ал жоғарыда айтып өткен әскери-спорттық байқауға ол тыңғылықты дайындалды. Конкурстың әрбір кезеңі тек физикалық күшті ғана емес, сонымен қатар сабырлық пен психикалық байыптылықты, тура тактика мен дұрыс стратегия қалыптастыруды қажет ететіні анық.
«Менің жетістігімнің құпиясы – тәртіп, табанды жаттығулар және әріптестерім мен командирлерімнің қолдауы дер едім. Менің ойымша, спорттың міндеті – адамды физикалық күшті ету, өзгелерден артық қылу емес. Спорт бірінші кезекте кез келген жанды көшбасшы болуға үйретеді, сондай-ақ командамен бірлесіп жұмыс істеуге, өзіңді бір отбасының мүшелеріндей сезінуге тәрбиелейді. Күнделікті өмірі жаттығу залында өтіп жатқан мен секілді әрбір адам спорттың негізгі мақсаты мен бойымыздағы жақсы қасиеттерді ашуға көмектесетін осындай керемет мүмкіндіктері барын естен шығармаса екен деймін. «Әскер тарланы–2024» байқауындағы жеңіс – тек бір менің емес, сонымен қатар әріптестерімнің де жеңісі. Өйткені олар менің осы биік мақсатқа жетуіме тілекші болып, қолдан келгенше барынша қолдау көрсетіп отырды. Бұған қоса әскери жарыстағы зор жетістігім – ең алдымен бүкіл отбасымның мақтанышы. Меніңше, өз ортаңның, туған-туыстарыңның арасында адал еңбегіңмен абыройға бөленуден артық құрмет жоқ», деді мергендер взводының сержанты А.Қарабай ағынан жарылып.
Қорыта айтқанда, аға сержант Асылбек – бірге әскери қымет атқарып жүрген әріптестері үшін нағыз үлгі алатын азамат. Сонымен қатар оның спорттық жарыс жолындағы бағындырған белестері қол астында әскери борышын өтеп жатқан мерзімді қызмет сарбаздарына шабыт сыйлайды. Жалпы, жеңіс – әскери тілмен айтқанда өз шебінде қайтпай тұрып алатындарға, қайсар мінез, өр рух арқылы артқа қайтуды білмейтіндерге ғана берілетін сый. Соның жарқын мысалы мен айқын көрінісі – аға сержант Асылбек Қарабайдың спорттағы ерліктері.
ШЫМКЕНТ
