Қазірде «Ауыл – ел бесігі» бағдарламасы аясында Үржар ауылында 10 төсектік күндізгі стационар мен 50 адам қабылдайтын дәрігерлік амбулатория салу жобасы іске асырылып жатыр. Облыстық денсаулық сақтау басқармасының басшысы Талғат Молдабеков ауылдағы бейінді мамандар тапшылығын шешу бағытында да мақсатты жұмыстар жүргізіліп жатқанын мәлім етті. Тіс дәрігері, хирург, акушер-гинеколог сияқты мамандарды толықтыру мәселесі келешекте шешімін таппақ.
«Кадр тапшылығы мәселесін шешуге 8,5 млн теңге көлемінде көтерме жәрдемақы бөлу қарастырылған. Біз биыл аса тапшы мамандықтардың тізімін анықтау жөніндегі жұмысты жалғастырамыз. Кадрлар даярлауға да ерекше көңіл бөлінеді. 2024 жылы жергілікті бюджет қаражаты есебінен облыстың 80 дәрігері шетелде тәжірибесін шыңдады. 15 маман Ресей, Германия, Әзербайжанның жетекші медициналық мекемелерінде тағылымдамадан өтті. Бұл бағдарлама біліктілікті арттыруға, ауыл медицинасы жұмысына заманауи тәсілдерді енгізуге бағытталған», дейді басқарма басшысы.
Облыста ауыл тұрғындарына 9 жылжымалы медициналық кешен қызмет көрсетеді. Олар 173 елді мекендегі тұрғындардың денсаулығын бақылауға алған. Өткен жылы 64 435 адамды тексерумен қамту жоспарланса, іс жүзінде 56 233 тұрғын медициналық көмекке жүгінген.
Ауыл медицинасын дамытудың негізгі бағыттарының бірі – материалдық-техникалық базаны жаңарту. 2024 жылы 1,3 млрд теңгеден астам сомаға 200 медициналық техника сатып алынды. Биыл 1,2 млрд теңгеге 182 жабдықтар сатып алу жоспары жүзеге асырылады.
Абай облысы
