Атырауда көпірден өзенге секірген жігітті полицейлер құтқарды

АСТАНА. 1 мамыр. Атырау қаласының полицейлері көпірден Жайық өзеніне секірген жігітті құтқарып қалды. Бұл туралы «Мой Город» хабарлады. Атырау облыстық ішкі істер департаменті баспасөз қызметінің жетекшісі Гүлназира Мұхтарованың айтуынша, өзіне қол жұмсамақ болған жігітті екі полицей құтқарып қалған. Тәртіп сақшылары көпірдің маңынан өтіп бара жатып, 25-30 жас аралығындағы азаматтың өзенге секіргенін байқаған. Олар бірден жігітті құтқаруға ұмтылған. Нәтижесінде подполковник Болат Дюсенов суға секіріп, оны жағаға алып шықты. Ал қасындағы подполковник Мұрат Демегенов жедел жәрдем мен полицейлерді шақырған. Айта кетейік, тергеу барысында жігіт 1983 жылы туған, Атырау қаласының тұрғыны екені анықталды. Сондай-ақ, ол жүйке аурулар деспансерінің есебінде тұрғаны да белгілі болды. Дәрігерлердің көмегінен кейін тәртіп сақшылары жігітті туыстарына тапсырды. Талғат Райымбек. Дерек, сурет: «Мой город».