Жерлестеріміз алдағы екі кездесуін Данияға қарсы өткізеді. 1 ақпанда Сённерборгте, 5 ақпанда Астанада ойнайды. Ұлттық команданың бас бапкері Рикардо Кака алдағы матчтарда мына спортшыларға сенім артып отыр: Қақпашылар – Лео Игита, Нарун Серіков, Рауан Сисенғалиев. Алаңдағы ойыншылар – Дуглас Жуниор, Арнольд Кнауб, Біржан Оразов, Дәурен Тұрсағұлов, Жаһангер Рәшит, Дамир Қайырбай, Ілияс Бердалин, Ақжол Дәрібай, Ержан Қарменов, Ринат Төреғазин, Азат Валиуллин, Ерсұлтан Сағындықов, Леонардо Мендонка.
Қазір еліміздің құрамасы Армениямен бірінші, екінші орындарды өзара бөлісіп тұр. Қос команданың қоржынында 4 ұпайдан бар. Үшінші сатыға жайғасқан Албанияда – 3 ұпай. Данияның қоржыны бос. Бүгінге дейін жерлестеріміз екі ойын өткізді. Сырт алаңда албандықтарды (2:0) ұтса, өз алаңында армениялықтармен (4:4) тең түсті.
