Құқық • 30 Қаңтар, 2025

Озбырлыққа қарсы бөлім құрылды

317 рет
көрсетілді
2 мин
оқу үшін

Қазір күн санап отбасындағы олқылықтардың ел ішін дүрліктіріп тұрғаны – басы ашық мәселе. Ер адам қуатын асыра пайдаланып әйелдерін соқ­қыға жығып, балалардың ата-анасыз аңы­рап қалғанын жіпке тізер болсақ, мұндай жағдай өте көп. Ерлі-зайыптылар арасында егесті болдырмау үшін жан-жақты шара­лардың қолға алынғаны дұрыс-ақ. Жақында тұр­мыстық зорлық-зомбылыққа қарсы күрес бойынша мамандандырылған бөлім ашылды.

Озбырлыққа қарсы бөлім құрылды

Сурет: gazeta.ru

Абай облысының Полиция департаментіне қарасты бөлімнің басты міндетіне зардап шеккендерге жедел көмек көрсету, тиімді шаралар қолданумен қатар әлімжеттіктің алдын алу мәселесі де кіріп отыр. Жаңадан құрылған бөлім келешекте жаза басқандарды бірден жазаға тартуды ғана қарас­тырмай, келеңсіз жағдайға тап болған отбасы мүшелерімен тығыз қарым-қатынас орнатып, оңтайлы қызмет атқаруды мақсат етіп отыр. Бұған қоса аталған бөлім зорлық-зомбылық туралы арыз-шағымдарға дер кезінде жауап қатып, жедел әрекет етуді, жиі қайталанатын оқиғалардың алдын алу мен зардап шеккендерге білікті заңгерлік, әлеуметтік және психологиялық қолдау көрсетуді міндет етіп жүктейді.

Өткен жылы өңірде 3 548 тұрмыстық құқық бұзу­шы­лық әрекетінің жолы кесілген. 3,5 мыңнан аса адам про­фи­лак­тикалық есепке алынды. Бұл тұрмыстық зорлық-зомбы­лықтың күн санап өршіп тұрғанының, ұдайы күрестің өзекті­лігінің айқын дәлелі болса керек. Жаңа құрылған бөлім дағ­дарыс орталықтарымен, медициналық меке­ме­лерімен, қоғамдық ұйымдармен тығыз жұмыс істейді. Бұл жәбірленушілерге кешенді көмек көрсетудің жүйесін құруға және әр кезеңде қолдауды қамтамасыз етуге мүмкіндік беретінін айтады мамандар.

«Бұл бөлімнің құрылуы – жай бастама емес, бұл өңірі­міз үшін аса маңызды қадам. Әрбір зорлық-зомбы­лық оқиғасының артында нақты адам тағдыры тұр. Сондық­тан біздің мақсатымыз – тек әрекет ету емес, осындай жағ­дай­лардың алдын алу. Қазір бөлімді жасақтау жұмыстары жүр­гізіліп жатыр: штат 36 инспектордан тұрады және олар осы маңызды міндетті орындауға толық дайын болады», дейді бөлім бастығы, полиция подполковнигі Виталий Каверин.

Бөлімнің жедел желісі тәулік бойы жұмыс атқарып, зор­лық-зомбылыққа тап болғандардың немесе осындай жағ­дай­дан құлағдар әрбір азаматтың арыз-шағымын қабылдай алады.

 

Абай облысы