- 25 ақпанда Алматыда PWL 8 турнирі өтеді. Сол жарыста 86 кг салмақтағы қазақтың белгілі еркін күрес шебері, екі дүркін әлем чемпионатының қола жүлдегері, Азияның үш дүркін чемпионы Азамат Дәулетбеков Магомедхабиб Кадимагомедовпен күш сынасады. Екеуінің де жасы 30-да. Магомедхабиб Дағыстанда дүниеге келгенімен, Беларусьтің намысын қорғап жүргеніне бірер жылдың жүзі болды. Ол – Токио Олимпиадасының күміс жүлдегері, Әлем кубогінің қола жүлдегері, Еуропа чемпионы. Бірақ бір айта кетерлігі, бұл табыстарына Кадимагомедов 74 кг, 79 кг салмақ дәрежелерінде өнер көрсетіп жүрген кездерінде қол жеткізді.
- Халықаралық Шахмат федерациясы өз рейтингін жаңартты. Үздіктер санатында еліміздің бірнеше өкілі бар. Әйелдер арасында Бибісара Асаубаеваның (2 494 ұпай) аяқалысы қуантады. Еліміздің ең үздік ойыншысы классикалық шахматтан 13-орында тұр. Рапидте 9 (2 446 ұпай), блицте 6 (2 441 ұпай) сатыға жайғасты. Қыздардың рейтингінде Меруерт Камалиденова (2 355 ұпай) 10, Әмина Қайырбекова (2 336 ұпай) 13, Алуа Нұрман (2 336 ұпай) 14-орынды еншіледі. Сондай-ақ Меруерттің рапид (4-орын, 2 368) пен блицтегі (5-орын, 2 324) нәтижелері де тәуір.
- 14–16 ақпан аралығында Әзербайжанның бас шаһары – Бакуде өтетін Grand Slam турнирінде еліміздің үш дзюдошысы белдеседі. Олар – Әділбек Берікұлы (66 кг), Ислам Тоқтасын (81 кг), Қуаныш Ратаев (100 кг).
- 27 жастағы кәсіпқой боксшы Садриддин Ахмедов (15-0, 13 КО) өзінің келесі кездесуін 19 сәуірде АҚШ-тың Калифорния штатындағы Коммерс қаласында «Латын баласы» деген бүркеншік есіммен танылған 34 жастағы Мексиканың марқасқасы Элиас Эспадасқа (23-6, 16 КО) қарсы өткізеді. Бұл сол кештің басты жекпе-жегі болмақ.
- Абу-Дабиде WTA-500 турнирі басталды. Жүлде қоры 1 064 510 АҚШ долларын құрайтын дүбірлі додада еліміздің екі теннисшісі бақ сынайды. Олардың екеуі де жарысты екінші кезеңнен бастайды. Елена Рыбакина әлемдік рейтингте 68 орында тұрған америкалық Кэти Волынецпен кездеседі. Юлия Путинцева чехиялық Маркета Вондроушева мен ұлыбританиялық Эмма Радукану арасындағы бәсекенің жеңімпазымен шеберлік байқасады. Роттердамдағы турнирде Александр Бублик бақ сынайды. Тұсаукесер кездесудегі оның қарсыласы – Чехияның өкілі Якуб Меньшик. Доданың жүлде қоры 2,5 миллион доллардан асады.
- 13–18 ақпан аралығында Талдықорғандағы «Жастар» спорт сарайында 22 жасқа дейінгі боксшылар арасында ел чемпионаты ұйымдастырылады. Жекпе-жектер 13 салмақ дәрежесінде өтеді. Жарыста алдағы уақытта ұлттық құрама команданың сапына қабылданатын резерв қарастырылады. Бір айта кетерлігі, бұрын-соңды елімізде осы жас ерекшелігі бойынша жарыс өтпеген. Бұл жоба жаңадан тағайындалған аға жаттықтырушы, Олимпиада чемпионы Бақыт Сәрсекбаевтың жетекшілігімен жүзеге асып жатыр.
- Кувейттің Эль-Кувейт қаласында стенд атудан еліміздің құрамасы оқу-жаттығу жиынын бастады. Оған ұлттық команда сапындағы 42 мерген қатысып жатыр. Жиын 13 ақпанда аяқталады.
