Алқалы жиынға Түркияның белді де белгілі театр саңлақтары мен дүниенің төрт бұрышынан құрметті қонақтар қатысты. Театр өнеріндегі әр аталым бойынша жеңімпаздар анықталып, жүлделер тапсырылды. Халықаралық мәртебелі байқаудың қазылар шешімімен Қазақстанның еңбек сіңірген қайраткері, жазушы-драматург Думан Рамазанға «Түркі әлемінің ең үздік драматургі» атағы берілді. Марапатты салтанатты жиында халықаралық ТҮРКСОЙ ұйымының бас хатшысы Сұлтан Раев пен «Театр» еларалық басылымының бас редакторы Нұрхан Услу тапсырды.
«Думан Рамазанның драмаларымен бұрыннан таныспын. Драманың қыр-сырын жетік білетін, ой-орамын тереңдеткен мықты драматург. Тарихи тақырыпта да, қазіргі заман туралы да әбден зерттеп-біліп жазады. Оның соңғы жылдары ұлттық сахнада жасаған тарихи полотнолары бүгінгі театрдың биігіне сайма-сай. «Керей - Жәнібек», «Абылай ханның арманы», «Жошы хан» және басқа да тарихи драмаларында ұлттық құндылықтар мен дәстүрлерге деген тарихи көзқарасты қапысыз бейнелеген. Қалеки сахнасында қойылған «Жошы хан» тарихи драмасы қазақ мәдениетіндегі жаңа кезеңнің басталғанын паш етеді», деді Сұлтан Раев.
