АСТАНАДА АЛАМАН АЙҚАС

Астанада 28 маусым мен 2 шілде аралығында Бокс федерация­сының ұйымдастыруымен спорттың осы түрінен ересектер арасында “Қазақстан Республикасы Президентінің Кубогы” жолындағы екінші халықаралық турнир өтеді. Оған 16 елдің ұлттық құрамдары қатысып, 11 салмақ дәрежесі бойынша қолғап түйістіреді. Бокс федерациясының үйлестірушісі Галиб Жафаровтың айтуынша, турнирге Қазақстан құрамында екі дүркін әлем чемпионы Серік Сәпиев, Украина жағынан 57 килода Бейжің Олимпиадасының чемпионы атанған Василий Ломаченко қатысады. Қазір осы жекпе-жектерге дайындық жұмыстары жүргізілуде. Осы аптада турнирге қатысатын командалар Щучьеде жаттығу жиындарын өткізіп, дайындықтарын пысықтады. Мұнда әр елдің құрамдары іріктеу сындарын ұйымдастырып, өзара спарринг жекпе-жектерін өткізді. – Осы жетіде боксшылардың бәрі Көкше өңіріне жиналды. Біздің құрам бір емес, үш құраммен жаттығу жиындарын өткізді, – дейді Г.Жафаров. – Ал Ресей турнирге екінші құрамын жіберіпті. Еуропа чемпионаты жақында ғана аяқталғандықтан, олар негізгі құрамға демалыс берген екен. Біз 60 килода екі дүркін Олимпиада чемпионы атанған Алексей Тищенко келе ме деп едік. Бірақ ол да келе алмады. Биылғы турнир жөнінде тағы бір атап өтетін нәрсе, онда же­ңімпаз атанған боксшыға 4 000 АҚШ доллары, екінші орын алғанға 3 000 доллар, қола жүлдегерге 1 500 доллар беріледі. Турнир АИБА ережесіне сәйкес, 3 минөттен 3 раунд бойынша өтеді. Дастан КЕНЖАЛИН. СПАРТАКИАДА МӘРЕСІНЕ ЖЕТТІ Елбасы Нұрсұлтан Назарбаев биылғы Қазақстан халқына Жол­дауында қазақстандықтардың 30 пайызға дейіні бұқаралық спортқа тартылуы керек деп міндет қой­ғаны белгілі. Елбасы Жолдауын қолдау, бұқаралық спортты жетіл­діру арқылы көпшіліктің спортқа деген көзқарасын қалыптастыру мақсатында, Ұлы Жеңістің 65 жылдық мерекесіне орайласты­ры­лып, Қызылорда облыстық ден­сау­лық сақтау басқармасының мұрындық болуымен өткізілген медицина қызметкерлерінің жыл сайынғы дәстүрлі 44 спартакиа­дасы өз мәресіне жетті. Айға созылған дәстүрлі шараға қаладағы барлық емдеу, алдын алу мекемелері қатысты. Спартакиада барысында арқан тарту, шахмат, үстел теннисі, волейбол, баскет­бол, шағын футбол, балық аулау, ор­ында тұрып секіру, суда жүзу се­кілді спорттың 9 түрінен жарыстар өткізілді. Спартакиада қорытындысында бірінші орынды облыстық пси­хо-неврологиялық диспансері, екінші орынды қалалық жедел жәрдем стансасы, үшінші орынды меди­ци­на колледжі иеленді. Спар­такиада көлемінде белсенділік танытқан командалар да назардан тыс қал­ған жоқ. “Ең жас, белсенді ко­ман­да” номинациясы бойынша Қы­зыл­орда “Өркениет” медици­на­лық колледжі, “Ең жігерлі ко­манда” номинациясы бойынша Қы­зыл­орда облыстық обаға қар­сы күрес стансасы, “Бірлігі жа­расқан ко­манда” номинациясы бой­ынша облыстық психо-нев­ро­логиялық ауруханасы марапат­тал­ды. Суда жүзу спорттық жары­сында бірінші орынды иеленген облыстық са­ламатты өмір салтын қалыптас­ты­ру орталығы марапат­тал­ды. Ме­дицина қызметкер­ле­рінің кәсіби мерекесі қарса­ңын­дағы спарта­киада қорытындысын­да жүлде­гер­лер мен командалық жеңімпаздар сый-сияпаттар және алғыс хаттар­мен марапатталды. Құрманғазы ЖҰМАҒҰЛҰЛЫ,  Л.Н.Гумилев атындағы ЕҰУ студенті.