«Менің арманым – үлкен құралай құсының ұясын тауып алу. Елімізде сирек кездесетін бұл құстың ұясын ешкім көрмеген. Зейнеткерлікке таяғанда Ұлттық паркке орнитолог болып жұмысқа орналасқанмын. Қазір зейнеткермін. Жалпы, құстарды зерттеумен 2009 жылдан бері айналысып келемін», дейді табиғат жанашыры Владимир Воробьев.
Орнитолог азаматтың атқарып жүрген жұмысы өте көп. Алтайдың қанаттыларын түгендеп, оларды суретке түсіру оңай шаруа емес. В.Воробьевтің өз ісіне берілгендігі сондай, қалтасында соңғы тиын қалса да, жұмысына айналған ермегіне жұмсаған. Қайбір жылдары бәленбай миллион теңгеге алысты көз алдыңа әкелетін фотоаппарат сатып алып, Алтайдағы құс біткенді түгендеген.
Зейнетке шыққан соң, ол сирек кездесетін құстарды зерттеуге кіріскен. Олардың мекенін, тыныс-тіршілігін бақылап, ғылымға орасан зор үлес қосты. Владимир Михайлович Алтай ұлары мен дөңтұмсық тұрпан секілді сирек кездесетін екі құсты «Қызыл кітапқа» енгізуге ықпал еткен.
Айта кетерлігі, 19 ақпан – Халықаралық орнитологтер күні. Осы орайда қанаттыларға қорған болып жүрген табиғат жанашырларының еңбектеріне сәттілік тілейміз.
Шығыс Қазақстан облысы
