Біздің отанымыз – бірліктің берекелі бесігі

Тұрақтылық тұғырындамыз

* Алматы Алматы қаласындағы Қазақстан халқы Ассамблеясының «Достық үйінде» «Қазақстан халқы Ассамблеясы жылын бастау» синхронды-акциясына арналған мерекелік шара болып өтті. Оған Жетісу жерін мекен еткен түрлі ұлт өкілдері, қалада орналасқан этномәдени бірлестіктердің белсенді мүшелері мен өнерпаздары, жоғары оқу орындарының студенттері мен қаладағы түрлі мемлекеттік емес ұйымдардың өкілдері қатысты. Қазақстан халқы Ассамблеясының туын көтеру салтанатты рәсімінде қала әкімі Ахметжан Есімов жиылған көпшілік алдында сөз сөйлеп, Мемлекет басшысы Нұрсұлтан Назарбаевтың Жетісу жұртына, мерекелік жиынға қатысып отырған көпшілік қауымға арнаған құттықтау сөзін оқып берді. – Құрметті қала тұрғындары мен қонақтары. Сіздерді халқымыздың бірлігі мен ынтымағын паш ететін мерейлі мерекенің басталуымен құттықтаймын. Біздің қаламызда орналасқан 34 этномәдени бірлестіктің мүшелері Елбасымыз Нұрсұлтан Назарбаев насихат етіп келе жатқан бейбітшілік пен ұлттар достығы, мемлекетіміздегі тұрақтылық пен берекелі өмірге зор үлесін қосып отырғандығын айтқым келеді. Біз, барша қазақстандықтар «Бір ел – бір халық» деген ұлы ұранмен бір жағадан бас, бір жеңнен қол шығарып, тату-тәтті өмір сүретінімізге сенімдіміз, – деді қала басшысы. Ынтымақ пен бірліктің, татулық пен тұрақтылықтың туы көтерілген сәтте аспанға бейбітшіліктің символы ретінде көгершіндер ұшырылып, түрлі ұлт өкілдерінен құралған өнерпаздар мерекелік концертті бастап жіберді. Бұл күні «Достық үйінде» әр ұлттың салт-дәстүрі мен әдет-ғұрпын баяндайтын көрмелер мен ел бірлігін насихаттайтын стенділер қойылды. Қанат ЕСКЕНДІР, «Егемен Қазақстан». Суретті түсірген Айтжан МЫРЗАНОВ. *Ақтау Мереке лебі ескен күн Кезінде іргетасын білек пен тілек қабыстыра жүріп әр ұлттың өкілдері қалаған, әрі «достық теңізі» деп аталатын Каспийдің жағасын жайлаған Ақтау қаласы бүгінде достық пен пейіл жарастығын биік ұстаған сан ұлт перзенттеріне мекен болып келеді. Республикамызда басталған Ассамблея жылы мерекесінің шымылдығын Маңғыстау облысы да сән-салтанатпен ашты. Академик Ш.Есенов атындағы Каспий мемлекеттік технологиялар және инжиниринг университеті алдына мемлекеттік органдар өкілдері, әскери бөлімдер сарбаздары мен жастар, Ассамблея мүшелері, қала тұрғындары көп жиылды. Әр ұлттың ұлттық киімдерін киген жастар әдеби-музыкалық композиция аясында патриоттық бағыттағы би үлгілерін көрсетті. Қолдарына Ассамблея жалауы мен белгісін ұстаған шараға қатысушылар еліміздің Әнұранын қосыла шырқады. Ассамблея жылының басталуымен аймақ басшысы А.Айдарбаев құттықтап, ынтымаққа ұйып, бірлігі жарасқан сан ұлтты мемлекетіміздің тәуелсіздігі баянды болып, береке-бірлігі нығая беруіне тілектестігін білдірді. Ал Ассамблея жалауын көтеру құрметі дүйім жұрттың мақтанышына айналған қос спортшы – бірі Олимпиада шыңын бағындырса, екіншісі кезекті Олимпиаданың алғашқы жолдамасын қанжығасына байлаған Ә.Ниязымбетов пен Б.Әбдірахмановқа бұйырды. Маңғыстау өнерпаздарының дулы концертіне ұласқан шарада әншілер мен күйшілер рухты көтерер патриоттық бағыттағы шығармаларды ұсынды. Биылғы жылы елімізде Қазақ хандығының 550 жылдығы мен Ұлы Жеңістің 70 жылдығы тойланатындығынан болуы керек, осы мерекелердің лебі бүгіннен басталып, Ассамблея жылы мерекесімен астасып кетті. Ауқымды экраннан тақырыптық бейнебаяндар көрсетіліп, орындалған шығармалармен үндестік тауып жатты, жастар қолынан ұшырылған көк, сары, ақ түсті жүздеген шарлар көкке көтерілді. Тұтас бір күнге созылған мереке облыстың барлық аудан, қалаларында жалғасын тапты. Гүлайым ШЫНТЕМІРҚЫЗЫ, «Егемен Қазақстан». *Ақтөбе

Түсіністік – бар табыстың бастауы

Облыс орталығындағы «Достық үйі­нің» алдындағы алаңға қала тұрғын­да­ры мол жиналды. Бұрыннан да үлкен мере­келік шаралардың ортасы болып табы­латын бұл үй сән-салтанатымен ерек­шеленеді. Шара өтіп жатқан алаңда еліміз­дің Көк байрағы желбіреп, ұлт­ара­­лық келісімнің ізгі ниетіндей болған жалау­лар мен жалаушалар қала тұрғын­да­ры­ның көңілдерінде көрікті ойды өрбітіп, біртұтас мемлекетіміздің бірлігі мен тату­­лығын тағы да паш еткендей. Олар­­дың арасында сан ұлттардың өкілдері бар. Қазақстан халқы Ассамблеясы жылының басталуына байланыс­ты бұл үлкен шарада ақтөбеліктер тағы да береке-бірліктің, татулық пен тұрақтылықтың айқын нышанын аңғартты. Облысты мекендеген тоқ­санға жуық этностың өкілдері ұлттар достығының берік бекемдігін көрсетті. Бұл өңір қашанда ұлтаралық келісім мен халық достығының мекені болып келеді. Облыс әкімі Архимед Мұхамбетов Қазақстан Президенті, Ассамблея Төрағасы Н.Назарбаевтың алдағы жылды Қазақстан халқы Ассамблеясы жылы деп жариялағанын жұртшылыққа жеткізе келіп, Елбасының құттықтауын оқып берді. Өңір басшысы мен Қазақстан халқы Ассамблеясының ардагері, «Қазақ­стан корейлері қауымдастығы» республи­калық қоғамдық  бірлестігі Ақтөбе филиалының төрағасы Константин Цхай  Қазақстан халқы Ассамблеясы жылының туын көтерді.Ту көтеру салтанатында театрландырылған көріністер қойылып, флеш-моб ұйымдастырылды және ҚХА эмблемалары бар шарлар ұшырылды. Қазақстан халқы Ассамблеясы жы­л­ы­ның бастау алуына орай облыстық «Достық үйінде» үлкен мерекелік концерт болды. Мерекелік концертте Ғазиза Жұбанова атындағы облыстық филормонияның, қалалық оқушылар сарайының және Құдайберген Жұбанов атындағы Ақтөбе өңірлік мемлекеттік университетінің  көркемөнерпаздары жұртшылыққа өз өнерлерін көрсетті. Сатыбалды СӘУІРБАЙ, «Егемен Қазақстан». * Атырау

Келісім – ең қымбат қазына

Мұнайлы өңірде де түрлі этностың өкілдері бір ел – бір тағдыр ұстанымымен еліміздің қуатты өркендеуіне лайықты үлесін қосып келеді. Қазір Атырауда әр ұлттың тарихы мен мәдениетін, тілі мен салт-дәстүрін кеңінен насихаттайтын 17 этномәдени бірлестік құрылған. Олардың жетекшілері тек өз бірлестіктерінің ғана емес, сонымен бірге, басқа этностардың да өткізген шараларына белсене араласады. Ал кеше сол бірлестіктердің жетекшілері мен мүшелері Қазақстан халқы Ассамблеясы жылының басталуына арналған шарада тағы да бас қосты. Бұл шара Х.Досмұхамедов атындағы Атырау мемлекеттік университетінің «Жайық» спорт кешенінде өтті. Шара барысында алдымен облыс әкімі Бақтықожа Ізмұхамбетов сөз алып, Елбасы Нұрсұлтан Назарбаевтың Қазақстан халқы Ассамблеясы жылының басталуына орай қазақстандықтарға арнаған құттықтауын оқып берді. Ал өзге ұлт өкілдері арасынан «Вайнах» чешен-ингуш этномәдени бірлестігінің ардагері, қазақ қызымен отау құрып, қазақ жерін қасиетті мекеніне балайтын Сейтамин Акаев, «Татулык» татар-башқұрт этномәдени бірлестігінің жетекшісі Гүл­сина Байкенова, Х.Досмұхамедов атын­дағы Атырау мемлекеттік университе­тінің студенті Вероника Ли құттықтады. – Қазақстан халқы Ассамблеясы құрылғаннан бергі 20 жылдың ішінде біз татулық пен достықтың, бірлік пен келісімнің ең қымбат қазына екенін ұғындық. Осы кезеңде кең-байтақ қазақ жерін мекендеген түрлі этнос өкілдерінің бір-бірімен қарым-қатынасы жақсарып, достығы мен бірлігі нығайды, –деді газет тілшісіне «Иверия» грузин этномәдени бірлестігінің жетекшісі Зураб Бобохидзе. –Мен Қазақстандай экономикасы қарқынды дамыған, тұрақтылығы мықты, татулығы жарасқан қуатты елде тұратынымды әр уақыт мақтан тұтамын. Балаларымның тек өз ұлтының ғана емес, Қазақстанда тұратын өзге де этностардың құндылығына құрметпен қарауын ұдайы қадағалап отырамын. Бұл күні түрлі этностың өкілдері өз тілдерінде де, өзге этнос тілдерінде де әндер шырқады. Жалпы, жыл аяғына дейін ұлтаралық достық пен татулықты бекіте түсуге ықпал ететін түрлі шаралар ұйымдастырылатыны көзделіп отыр. Жолдасбек ШӨПЕҒҰЛ, «Егемен Қазақстан». Суретті түсірген Рахым ҚОЙЛЫБАЕВ. *Көкшетау

Бақ-берекенің бесігі

Көкшетауда маңызды саяси оқиға­лардың барлығы дерлік Тәуелсіз­­дік ала­ңынан басталып, «Менің Қазақ­станым» сәулет-композициялық кешенін­­де кеңінен жалғасын табатын дәстүр қалып­тасқан. Елбасы Нұрсұлтан Назарбаев­тың Жарлығымен жарияланған Қазақстан халқы Ассамблеясы жылының шымыл­дығы да осында түріліп, мемлекеттік органдардың, еңбек ұжымдарының, этномәдени және қоғамдық бірлестік­тер­дің, ардагерлер мен жастар ұйымдарының өкілдерінен құрылған мерекелік шеру Абай көшесін шаттыққа толтырып, «Ме­нің Қазақстаныма» мерейленіп жетті. Қазақстан Республикасының мем­лекеттік рәміздерімен безендірілген ке­шен­нің тутұғырында Қазақстан халқы Ассам­блеясы жылының жалауы көтеріліп, жиналған 500 адам бір ауызбен еліміздің Әнұранын орындады. Патриоттық ән-күй­лер жігер тасытып, жастардың «Дос­тық» флеш-мобы көңіл тербеді. Жан-жағымыз ел тарихы белестерін елес­­тете­тін туларға, мемлекетіміздің асыл мақ­­­саттарын асқақтатқан Қазақстан халқы Ассам­блеясының логотиптеріне тол­ды да кетті. Жұртшылық қосылып ән салып, құ­шақ­тасып амандасып жатыр. Бұл бүкіл әлемге аты танылған Қазақ елі бейбіт­­шілік пен бақ-берекенің бесігі, ұлт­тарды ұйыстырған алдыңғы қатарлы жай­ма-шуақ мемлекет екендігінің белгісі еді. Облыс әкімінің орынбасары Нұрлан Нұркенов жұртшылықты құттықтау сөзін Елбасы, Қазақстан халқы Ассам­блеясының Төрағасы Нұрсұлтан Назарбаевтың Ассамблея жылына арналған үндеуін оқып берумен бастады. – Бүгінде біздің бірлігіміз – «2050» Стратегиясын жүзеге асырудың шешуші факторы. Стратегияда көпэтносты халқымыздың даналығы көрініс тапқан. Ол біздің бітімнің, рухани келісімнің айрықша мәдениетінің жоғары қағидаттарынан арқау алады. Елбасының татулық пен қоғамдық келісім идеяларын кеңінен көрсетуге бағытталған бүгінгі үлкен шара – мемлекетіміз үшін маңызды оқиға. Біз, ақмолалықтар «Қазақстан халқы Ассамблеясы – 20 игі іс» эстафетасын бірінші болып қабылдап отырмыз. Бұл біз үшін үлкен абырой және жоғары жауапкершілік жүктейді. Айтулы оқиғаға орайластырылған ғылыми-танымдық, бұқаралық шаралар Көкшетаудағы «Достық үйінде», білім ошақтарындағы «Қоғамдық келісім» ұйымдарында, кітапханалар мен музейлерде, сондай-ақ облыстың барлық елді мекендерінде өткізілді. Бақберген АМАЛБЕК, «Егемен Қазақстан». *Қарағанды

Мақсат айқын, міндет белгілі

Кеше Қарағанды қаласында тату­лығымыздың тұғырын бекіткен түрлі этнос өкілдерінің қатысуымен Қазақстан халқы Ассамблеясы жылының сөреден шығуына байланысты салтанатты шаралар болып өтті. Оған облыс әкімі Нұр­м­ұ­хамбет Әбдібеков қатысып, Елбасы Нұрсұлтан Назарбаевтың Қазақстан халқы Ассамблеясы жылының ашылуына орай жолдаған құттықтауын оқып берді. Мұның алдында Қарағандының орталық алаңында Ассамблея туын көтеру рәсімі өтті. Тудың облысқа танымал адамдардың қатысуымен көтерілгенін атап өткен жөн. Ал бұл шарадан соң әр ұлттың ұлттық киімдерін киген жастар әдеби-музыкалық композиция шеңберінде патриоттық бағыттағы театрландырылған көріністер көрсетті. Қолдарына Ассамблея жалаушасын ұстаған жұртшылық өкілдері Қазақстан Республиканың Әнұранын қосыла шырқады. Қазақстан халқы Ассамблеясы жылының басталуына орай бұл үлкен шара барысында қарағандылықтар тағы да ынтымақ пен бірліктің, татулық пен достықтың елімізде салтанат құрып отырғанын өздерінің көңіл-күйлерімен паш етті. Бұл өңір ежелден ұлтаралық келісім мен халық достығының ошағына айналған. Ал Қазақстан халқы Ассам­­­блеясы жылының бастау алуына орай облыс орталығында үлкен мерекелік концерт ұйымдастырылғанын да айта кетейік. Кезінде іргесін білек сыбана, тілек қоса жүріп әр ұлттың өкілдері бекіте түскен кеншілер қаласы қазіргі таңда достығы мен бірлігі жарасқан сан ұлттың перзенттері тату-тәтті өмір сүріп жатқан өндірісті қала саналады. Отанымыздың орталығында ту тіккен шаһар қазіргі таңда өзінде тұратын барлық этностар бірлігінің нағыз нышанына айналған. Достық пен түсіністіктің арқасында Қарағанды қаласында ғана емес, жалпы өңір елді мекендерінде бір жеңнен қол, бір жағадан бас шығара ынтымақпен еңбек еткен халықты көресің. Кешке салым қала орталығындағы алаңда Ассамблея жылына арналған шаралар одан әрі жалғасын тапты. Айқын НЕСІПБАЙ, «Егемен Қазақстан». * Қостанай

Достық пен бірлік баяны

Қазақстан халқы Ассамблеясы жылының қадамы Қостанайда «Жастар қоғамдық келісімді қалайды» атты жастар флеш-мобынан басталды. Қолдарына алуан түсті гүл, лента, шар ұстаған жастардың «Қазақстан халқы Ассамблеясына – 20 жыл!», «17 миллион қазақстандықтың қалауы – достық, бірлік!», «Жастар қоғамдық келісімді қолдайды!» деген дауысы жарқын естіледі. Қазақстанды құт мекен еткен әртүрлі ұлттардың әуені қалықтады. Достық пен бірлік, адамдар арасындағы шынайы сыйластық және жастар жалыны барда, қыс ауасының қытымырлығы да ығысатындай. Флеш-мобтың салтанатын келтіріп тұрған жастардың алаулаған жүзін аяз өбеді. Жастар жиынында Ассамблея жылының туы салтанатты көтерілді. Оны көтеру құрметі облысқа, республикаға белгілі спортшы жастар Тоқтар Жиентаев, Иван Гербер, Елизавета Яковлева, Марс Ақбалинов, Жадыра Қалиева және Ұлы Отан соғысының ардагері Михаил Подоляков пен бүгінгі күннің батыры, бірнеше адамның өмірін өрттен қорғап қалған аға сержант Ерлан Дүзеновке бе­рілді. Ту салтанатты көтерілгеннен кейін жастар аспанға достықтың, бейбіт өмір­дің белгісіндей түрлі-түсті шарлар ұшырды. Мұнан кейін Қазақстан халқы Ассам­блеясының ашылу салтанаты І.Омаров атындағы облыстық қазақ драма театрында жалғасты. Онда облыс әкімі Нұралы Сәдуақасов қостанайлықтарды Қазақстан халқы Ассамблеясы жылының ашылуымен құттықтады. – Елбасы Нұрсұлтан Назарбаевтың бастамасымен құрылған Қазақстан халқы Ассамблеясы 20 жыл бойы қоғамдық келісімнің қазақстандық үлгісінің басында тұрды, – деді Нұралы Мұстафаұлы. – 2015 жыл Елбасы Жарлығымен Қазақ­стан халқы Ассамблеясының жылы бо­лып­ жарияланды. Осылай деген әкім Қа­­зақ­стан халқы Ассамблеясының Төр­ағасы Нұрсұлтан Назарбаевтың қазақ­стан­­дықтарға құттықтау сөзін оқып берді. Салтанатты жиындағы Қазақстанның өткен тарихи жолы түрлі ұлт өкілдерінің ән-жырымен, биімен бейнеленді. Нәзира ЖӘРІМБЕТОВА, «Егемен Қазақстан». *Қызылорда

Ырыс ұйыған ел

Сырдың бойында Ассамблея жылының ашылуы сән-салтанатымен басталды. Тұрақтылық пен толеранттылықтың, ырыс пен ынтымақтың ұйытқысындай болған ұйымның мерейін асырып, мейманасын тасытатын шаралар күн ұясынан көтеріле туын тіктеді. «Мұз айдынында» эстафеталық жарыс өтті алдымен. Халық мерекенің берекесіне ауылшаруашылық жәрмеңкесінде куә болды. Онан соң «Сыр Ана» монументінен бастау алған автошеру бүкіл қаланы аралап, Орталық алаңға келіп тоқтады. Бұл сәтте Қазақстан халқы Ассамблеясы жылының туы ресми түрде көтеріліп, «Жастар қоғамдық келісімді қолдайды» атты флеш-моб өтіп жатқан. Онан кейінгі салтанатты жиын Нартай Бекежанов атындағы драма театрдың сахнасында жалғасты. Түрлі ұлт пен ұлыстың өкілдері өздерінің ұлттық киімін киіп, бір-бірімен айқара құшақтасып амандасып, мерейлі мерекемен құттықтасып, абыр-сабыр күй кешті. Театрдың кіре берісіне әр халықтың өмірінен сыр шертетін бұйымдар қойылып, көрме ұйымдастырылыпты. Ассамблея жылының ашылу салтанатына қатысқан облыс әкімі Қырымбек Көшербаев Елбасының хатын оқып беріп, құттықтау сөз сөйледі. Аймақ басшысы өз баяндамасында аталған ұйымның мәні мен маңызына тоқталып, қоғамдағы ерекше рөлін атап өтіп, бірлік пен ынтымақ болған жерге береке орнайтынын айтты. Салтанатты шараның соңы «Менің елім – Мәңгілік Ел» атты театрландырылған қойылымға ұласты. Әрбір ұлттың әні орындалып, биі биленіп, сахна жайнап сала берді. Расында, Қазақстан халқы Ассамблеясы секілді қоғамдық институт әлемнің ешбір елінде жоқ. Елбасы Нұрсұлтан Назарбаевтың тікелей бас­тамасымен құрылған ұйым еліміздегі тұрақтылық пен дамудың өзегіндей дүние екені анық. Ержан БАЙТІЛЕС, «Егемен Қазақстан». *Орал

Туыстық туы қашанда жоғары

Кеше Жәңгір хан атындағы Батыс Қазақстан аграрлық-техникалық университетінің алдындағы алаңға батысқазақстандық жұртшылық өкілдері өте көп жиналды. Олар мұнда Ассамблея жылының ашылуына орай өткізілген шараларға қатысты. Ассамблея жылының ашылу рәсімі аясында Мәңгілік Ел көшіне беттеп бара жатқан Қазақ елінің кешегісі мен бүгінгісіне қатысты оқиғаларды қамтитын театрландырылған көріністер терең әсер қалдырды. Бұдан соң Қазақстан халқы Ассам­­блея­сы жылының эмблемасы белгілен­ген­ Жер шарының бейнесі мен Ассам­­блея жылы­ның туы көкке көтеріле берді. Бұл та­маша қайталанбас сәт «Жастар қоғам­д­ық келісімді қорғайды» атты 400-ге тарта студент пен жастар қатыс­қан флеш-мобтың түйініне айналды. Келесі кезекте аталған аймақтық жоғары оқу орны­ның мәжіліс залында ұлттық-мәдени бірлестіктер өкілдерінің бастамасымен «Ассам­б­леяның 20 жылдығына – 20 жақ­сы іс» атты эстафетаның беташары өткізілді. Бұл күні шоқтығы биік шараларға жиналған жұртшылық өкілдері алдында Батыс Қазақстан облысының әкімі Нұрлан Ноғаев батысқазақстандықтарға арналған Елбасының құттықтауын оқып берді. Бұдан әрі облыс басшысы Қазақстан халқы Ассамблеясының бұған дейінгі тарихы бірлік пен келісім, достық пен туысқандық барша қазақстандықтың басты құңдылығы екенін дәлелдеп бергендігі жөнінде ой қорытты. Ассамблея жылын мерекелеу рухани келісім мен татулыққа негізделген біздің осындай терең мазмұнды байланыстарымыз бен қарым-қатынасымызды одан әрі тереңдетуге қызмет жасай алады, деді одан әрі ол. Бір сөзбен айтқанда, еліміздің батыс­тағы қақпасы – Оралда өткізілген Ассам­блея жылының ашылу сәті жарқын мерекеге айналды. Орал өңірін мекендейтін ті­легі бір, мақсат-мүдделері ортақ әртүрлі этнос өкілдері де газет тілшісіне өз ой-пікір­лерін жеткізді. Солардың бірі Орал – Жа­йық казачествосы басқармасының төр­ағасы Анатолий Авилов бізге былайша үн қатты: – Қазақстан халқы Ассамблеясы жылы – Елбасымыз Нұрсұлтан Назарбаевтың баршамызға ортақ қазақстандық қоғам­дық келісімді орнықтыру мен қалып­тас­тырудағы баға жетпес қызметін өсірмей, дабыраламай, әсірелемей айтатын уақыт. Бізде бүкіл әлемге үлгі бола алатындай этносаралық жарасымдылық пен үйлесімділіктің қайталанбас моделі жасалды. Біздің күшіміз – бірлікте. Біз Ассамблея рөлі бұдан әрі де көтерілетініне, оның атқаратын қызметі одан әрі нығая беретініне сенеміз. Темір ҚҰСАЙЫН, «Егемен Қазақстан». * Өскемен

Ынтымақтың алтын арқауы

Елімізде Қазақстан халқы Ассамблея­сы жылының ашылуына орай өткен жал­пыхалықтық синхрон-акцияға шығыс­қазақстандықтар да айрықша үн қосты. Ертеңгілік ерке Ертістің сол жағасындағы Комсомол аралына халық толассыз ағылды. Облыс басшыларымен бірге өңір­дегі ҚХА мүшелері, этномәдени бірлес­тіктердің өкілдері, жоғары оқу орында­рының студенттері және қала тұрғындары мен қонақтары қатысқан акцияға барлығы 7 мыңнан астам адам жиналды. Аталған шара Қазақстан халқы Ассам­блеясының мерекелік туын зеңгір көкке салтанатты түрде көтеруден басталды. Туды Ұлы Отан соғысының ардагерлері Әбілмәжін Байжұманов, Дмитрий Москальцов, Олимпиада чемпионы Ольга Рыпакова және өңірдегі түрлі этномәдени бірлестіктердің жастары көтерді. Мемлекет басшысы, Қазақстан халқы Ассамблеясының Төрағасы Нұрсұлтан Назарбаевтың акцияның қатысушыларына жолдаған құттықтау лебізін облыс әкімі Даниал Ахметов оқып беріп, биыл елімізде бірқатар айшықты мерейтойлар өтетінін, оның ішінде Қазақстан халқы Ассамблеясы жылының ашылып отырғанын жеткізді. – Елбасы Нұрсұлтан Назарбаевтың кемел саясатымен құрылған Қазақстан халқы Ассамблеясы бірлік пен татулықтың бірегей үлгісіне айналды. Достыққа дәнекер ұлағатты істердің ұйытқысы болды. Биыл еліміздегі бейбітшілік пен ынтымақтың алтын арқауына айналған Ассамблеяға 20 жыл толады, – деді өңір басшысы Даниал Ахметов. Шара соңы мерекелік концертпен жал­ғасып, Достық үйлері мен этно­мәдени бір­лестіктердің құрамындағы шығарма­­­шылық ұжымдар өз өнерлерін паш етті. Сондай-ақ, шаңғыдан жарыс ұйымдас­тырылды. Акцияға қатысушылар барлық ұлт пен ұлыс өкілдерінің ұлттық тағам мәзірінен дайындалған «Достық дастарқанынан» дәм татты. Мұз айдынында «Біз достығымызбен қуаттымыз!» атты жастардың флэш-моб акциясы да жұрт назарын аударды. Аталған синхрон-акцияның негізгі тіні – Елбасы Нұрсұлтан Назарбаевтың қоғамдық келісім және бейбітшілік идеялары ұстанымын паш етуге, «Нұрлы Жол – болашаққа бастар жол» Жолдауындағы міндеттер мен тапсырмаларын жүзеге асыруға, «Мәңгілік Ел» идеясының төңірегіне топтасуға және Қазақстан халқы Ассамблеясы жылының аясында береке-бірлігіміз бен достығымызды нығайтуға бағытталған. Думан АНАШ, «Егемен Қазақстан». *Павлодар

Таңдауымыз – татулық

Облыстағы Ассамблея мүшелері, этномәдени бірлестіктердің жетекшілері, Ассамблеяның жастар қанаты, Ұлттық жаңғыру мектебінің ұстаздары, соғыс және еңбек ардагерлері, студенттер, мәдениет, білім, спорт саласының қызметкерлері облыс орталығына кіреберістегі «Бірлік және келісім монументі» жанынан Астанадан келген Ассамблея жылының туын күтіп алды. – Бұл күн бәріміз үшін ерекше есте қалады, елімізге тағы бір мереке келіп қосылғандай, – деді этнобірлестіктер жастар кеңесінің төрайымы  Элина Паули.  Иә, Елбасы Жарлығымен 2015 жыл Қазақстан халқы Ассамблеясының жылы болып жарияланды.  Ту көтерген эстафета мүшелері облыстық Жүсіпбек Аймауытов атындағы музыкалық-драма театрын, Мемлекеттік рәміздер алаңын, Ш.Уәлиханов пен Г.Потанин ескерткіштерін, Саяси қуғын-сүргін құрбандарын еске алу ескерткішін, «Даңқ» обелискісін айналып өтіп, ескерткіштерге гүл шоқтарын қойды. Содан соң, Қазақстан халқы Ассамблеясы жылының туы  облыс орталығындағы «Достық үйінің» алаңына келіп жетті. Алаңға Ассамблея туын салтанатты түрде ақын Арман Қани, конькиші Людмила Прокашева, студент Анжелика Креймер, чешен-ингуш этномәдени бірлестігінің төрағасы Мумади Абдурашид, күйші Олжабай Темірлан, татар-башқұрт өкілі Ринат Абдулкаюмов алып шықты.  Ту көтерудің салтанатты рәсімін облыс әкімі, облыстық Қазақстан халқы Ассамблеясының төрағасы Қанат Бозымбаев, «Ватан» әзербайжан қоғамының төрағасы Джафар Махмудов, этномәдени бірлестіктердің төрайымы Элина Паули жасады. Облыс әкімі Қ.Бозымбаев Елбасы Нұрсұлтан Назарбаевтың құттықтау сөзін оқып берді.  Сонымен бірге, «Достық үйінің» алаңында «Халық достығы» атты флеш-моб ұйымдастырылды.  Облыстық ҚХА жастар бірлестіктерінің көшбасшылары «Менің таңдауым – бірлік» деген жазуы бар шарлар ұшырды. Орталық алаңда әртүрлі  ұлттардың әуендерінде ән айтылып,  би биленді. «Достық үйінде» әртүрлі ұлт өкілдерінің  халық қолөнерінің көрмесі ашылды. Облыстық этномәдени бірлестіктердің басшыларымен түрлі кездесулер өткізілді.  Апта бойы  Ассамблея жылына арналған түрлі шаралар облыстағы аудан, қала, ауылдарда да аталып өтеді. Мектептерде  Қазақстан халқы Ассамблеясы тарихының құрылуы, қазіргі жұмысы, болашағы тақырыбында лекция сабақтары жүреді. Сонымен қатар, облыстағы кітапханаларда кітап көрмелері, кездесулер және тағы басқа шаралар ұйымдастырылады. Фарида БЫҚАЙ, «Егемен Қазақстан». Суретті түсірген Владимир БУГАЕВ. *Петропавл

Тағаттылық тамыры тереңде

Еліміздің өзге аймақтары сияқты Қызылжар өңірінде де Қазақстан халқы Ассамблеясы жылы салтанатты түрде ашылып, халықтық мерекеге ұласты. Елбасы Н.Назарбаевтың арнайы Жарлығымен жарияланған ресми шара облыс әкімі Ерік Сұлтановтың қатысуымен М. Қозыбаев атындағы Солтүстік Қазақстан мемлекеттік университетінде «Жастар қоғамдық келісімді қолдайды!» атты флеш-мобпен өтіп, ең басты құндылықтарымыз – Тәуелсіздігіміз, бірлігіміз бен ынтымағымыз кеңінен жырланды. Соғыс, еңбек ардагерлерінен, жастардан, қоғамдық ұйымдар мен ұлттық-мәдени бірлестіктер өкілдерінен құралған мыңдаған адам осында жиналып, бірегей институт – Қазақстан халқы Ассамблеясының еліміздегі барлық ұлт пен ұлысты бір шаңырақ астына топтастыра білген табанды да жігерлі жұмыстарына қолдау көрсетті. Иә, Мемлекет басшысының салиқалы да байыпты саясаты арқасында Қазақстанның татулық мекеніне, достықтың бекем ордасына айналғанына ешкім шәк келтіре алмасы анық. Ерік Хамзаұлы солтүстікқазақстандықтарды еліміздің барлық жерлерінде бір мезгілде алауы тұтанған салтанатты мерекенің мәре алуымен құттықтап, Елбасының Қазақстан халқы Ассамблеясының ашылуына арналған құттықтауын оқып берді. Еңбек ардагері Григорий Кухарь, №17 Ұлттық жаңғырту мектебі тарих пәнінің мұғалімі Ирина Тухватулина өз сөздерінде бақ-береке, ырыс еселенген, әсем ән мен күй тербелген еліміз қоғамдық бірлікті ту етіп ұстау арқылы дамыған, болашағы жарқын мемлекетке айналғанын, кез келген ғаламат жоспарларды іске асыруға қабілетті екенін толғана жеткізді. Облысқа танымал бір топ соғыс, еңбек ардагерлері мен спорт майталмандары Ассамблея туын көтеру құрметіне ие болды. Акция одан әрі еңселі білім ордасының акт залында жалғасып, Ассамблеяның Қазақстан азаматтарын отансүйгіштік рухта тәрбиелеудегі, олардың арасындағы достық пен ынтымақты нығайтудағы өлшеусіз ісі паш етілді. Соның нақты көрінісі ретінде жүзден астам этностардың басын біріктіріп отырған өңірдің берекелі де мерекелі келбеті әр жүрекке нұр болып құйылып жатты. Мерекелік концерт «Қазақстан – ортақ үйіміз» атты вокальді-хореографиялық композициямен ашылып, сахнаға кезекпе-кезек көтерілген «Арай», «Қарлығаш», «Дружные ребята», «Экспромт», «Алуа», «Қуанамын» би ансамбльдері әр халықтың билерін нақышына келтіре орындап берді. Түрлі тілдерде шырқалған әндерді көрермендер өте жылы қабылдап, үлкен ықыласпен тыңдады. Өмір ЕСҚАЛИ, «Егемен Қазақстан». Суретті түсірген Талғат ТӘНІБАЕВ. *Талдықорған

Жарасымды жалғаған жыл

Талдықорғандағы «Жастар» спорт сарайында Қазақстан халқы Ассамблеясы жылының ашылуына орай салтанатты жиын өтті. «Ғасырлар үндестігі» атты Қазақ хандығының 550 жылдығынан сыр тартқан театрландырылған көрініс Шоқан, Сүйінбай, Абай туындыларын паш ете Көк байрақты желбірете ел болып Әнұранды орындаумен ұласты. Елбасының Ассамблея жылы аясындағы халыққа арнаған құттықтауын Алматы облысының әкімі Амандық Баталов оқып берді. Ассамблея жылының туы көтеріліп, әр этнос өкілдері ұлттық билерін билеп, мерекелік ән шашумен көңілдерге қуаныш нұрын себе білді. Белгіленген кестеге сәйкес, «Қазақстан халқы Ассамблеясы – 20 ізгі іс» атты ауыспалы эстафетасының символы Ақсу ауданының өкілдеріне тапсырылды. Жыл соңына дейін бұл тайқазан Алматы облысының аудандары мен қалаларын аралата өткізіліп, Астанаға жеткізілетіні де хабарланды. Сондай-ақ, республикалық, облыстық дең­­­гейлерде түрлі салалар бойынша байқаулар өткізілетінін де сала өкілдері жариялады. Беларусь майданына қатысқан ардагерлерге «Беларусь мемлекетінің неміс басқыншыларынан азат етілгеніне – 70 жыл» медалін облыс әкімі осы күні табыс етті. Айтулы шараның тағы бір артықшылығы сахна төріне көтеріліп, ізгі ниеттерін білдірген түрлі этнос өкілдерінің барлығы таза қазақ тілінде еш мүдіріссіз сөйлеп, жамиғаттың қошеметіне бөленді. Осынау ізгілікті «Тіл-парасат» республикалық байқауының жеңімпазы Татьяна Бедарева «мемлекеттік тілге деген құрметіміз» деп түйіндеді. Жетісу жерінде тұратын 103 этнос өкілі бас қосқан жиын «Қазақстан – Нұрсұлтан!» ұранымен әрленіп, бауырсақ мерекесімен шадыман шаттыққа бөледі. Нұрбол ӘЛДІБАЕВ, «Егемен Қазақстан». *Тараз

Шаңырағы биік шаттық мекені

«Ел бірлігі – ең асыл қасиет» деп Елбасымыз айтқандай, Қазақстан көптеген ұлттардың басын бір шаңырақ астына біріктіріп отырған тұғырлы мекен. Иә, осынау уақыт аралығында жас барыс­тай қуатты мемлекетіміз әлемге өзін таны­тып, дамудың қарышты қадамдарын жасаған серпінді ел ретінде мойындалып үлгерді. Ең бастысы, сүттей ұйыған ұлттар татулығының жарқын үлгісіне айналды. Кеше Қазақстан халқы Ассамблеясы жылының Жамбыл жерінде басталған салтанатты сәттерін әулиеаталықтар береке, бірлігімен қарсы алды. Қасиетті Әулиеата өңірі – ежелден достықтың киелі мекені. Жалпы, Жамбыл облысында сексеннен астам ұлттың өкілдері тұрады. 26 облыстық, 47 аудан­дық этномәдени бірлестік жұмыс істейді. Бұл күні Тұңғыш Президент саяба­ғынан басталған марафон, «Баласағұн» ОКЗ алдындағы Қазақстан халқы Ассамблея­сы жылының туын салтанатты көтеру рәсімімен жалғасты. Жастар жеткізген Достық туын мұнан соң Лондон Олимпиадасының қола жүлдегері Ақжүрек Таңатаров, қоғам қайраткері Александр Савченко және Жамбыл облысының әкімі Кәрім Көкірекбаев тұғырға бекітіп, салтанатты жағдайда биікке көтерді. Сондай-ақ, «Жастар қоғамдық келісімді қолдайды» жастар флеш-мобы, «Шебер» халықтық-қолданбалы өнер шеберлерінің көрме-жәрмеңкесі, «Қазақстан халқы Ассамблеясы жылының бастау алуы» синхрон-акциясының салтанатты ашылуы көпшілікке көтеріңкі көңіл-күй сыйлады. Оралхан ДӘУІТ, «Егемен Қазақстан». * Шымкент

Жаса, самға, Қазақстан!

Жаңа әкімшілік-іскерлік орталығын­­дағы алаңда Қазақстан халқы Ассамблеясы жылының ашылуы салтанатты жағдайда өтті. Оңтүстік Қазақстан облысында жүз­ден аса әртүрлі этнос өкілдері, жиыр­ма мәдени-ұлттық бірлестік жұмыс жасай­ды. Қазақстан халқы Ассамблеясы жылы – бейбіт­шілік пен келісім, татулық, «Мәңгі­лік Ел» идеясын іске асыру, «Нұрлы Жол – болашаққа бастар жол», яғни жаңа­ру жылымен астасып жатқан құт­ты жыл. Сөз алған этнос өкілдері ойларын еліміз үшін басты құндылықтар болып сана­латын осы жайттардан алып жатты. Ассамблея туын салтанатты түрде алып шыққан спортшыларды уақытында Қазақ­стан бокс құрамасының капитаны болған, еңбек сіңірген спорт шебері, КСРО-ның төрт дүркін, Еуропаның екі дүр­кін, Азия мен Азия ойындарының екі дүркін чемпио­ны Нұржан Сманов бастап шықты. Ал 15 метрлік туды көтергендер – даңқты балуан Бисолт Дециев, ауыр ат­­лет­ші Андрей Макаров, боксшы, Олим­пиа­­даның қола жүлдегері Еркебұлан Шыналиев. Бұл салтанатты шарадан кейін «Жастар қоғамдық келісімді қолдайды» атты флэш-моб оңтүстік өрендерінің орындауында көпшілік назарына ұсынылды. Ал Оңтүстіктен бақытын тапқан этнос өкілдерінің салтанатты шеруінен кейін облыстық мәслихаттың депутаты, «Ел бір­лігі» депутаттар тобының жетекшісі Әбіл­қасым Досболов құттықтау сөз сөйледі. «Түркістан» сарайында жалғасқан мерекеде облыс әкімінің орынбасары Сапар­бек Тұяқбаев Қазақстан Респуб­ликасы­ның Президенті – Қазақстан халқы Ассам­блеясының Төрағасы Нұрсұл­тан Назарбаевтың Қазақстан халқы Ассам­блеясы жылының ашылуына арналған құттықтау сөзін оқыды. Салтанатты кеш концерттік бағдар­ламаға ұласты. Бақтияр ТАЙЖАН, «Егемен Қазақстан». Суретті түсірген Қайсар ШЕРІМ.