Мәскеудегі Жеңіс шеруі ерекше тойланбақ

АЛМАТЫ. 3 мамыр. Ресей Федерациясы Президенті әкімшілігінің жетекшісі Сергей Иванов: «Әлем жұртшылығы – Қызыл алаңда Ұлы Жеңістің 70 жылдығына орай өтетін әскери шерудің бұрын-соңды болмағанына куә болады», – деп мәлім етті. Бұл туралы Russia Today хабарлады. Салтанатты шеру Мәскеу уақытымен таңғы сағат 9:00-де басталады. Шеруге 15 мың адам қатысады. Салтанат – тарихи бұрынғы және қазіргі деген екі бөлімнен тұрады. Қызыл алаңнан бұдан 70 жыл бұрынғы кеңестік әскери киім үлгісіндегі жауынгерлер сол кездегі жауынгерлік туларды көтеріп, жүріп өтеді. Соғыс кезіндегі әскери техниканың үлгісі көрсетіледі. Сондай-ақ, Сергей Иванов: «Жерде – қазіргі заманғы Ресей Қарулы Күштерінің қуатын көрсету мақсатында алаңға РС-27 «Ярс» зымырандық кешендері, дәлдігі зор артиллериялық қондырғылар бой көрсетсе, көкте – Су-30, Су-35 секілді ультра-заманауи ұшақтар жұрттың назарына түсетін болады»,– деді. Жалпы шеру өткізу үшін бұл науқанға Ресей 28, 5 миллиард рубль бөлді. Оның 12,5 миллиарды соғыс және тыл ардагерлеріне мерекелік бір реттік сыйақы ретінде төленеді. 8-10 мамыр аралығында Мәскеуде өтетін бұл Жеңіс шеруі мерекесіне дүние жүзінің 30 елінен мәртебелі меймандар, БҰҰ мен ЮНЕСКО және басқа да халықаралық ұйымдардың өкілдері қатысады. Талғат Сүйінбай. Дерек, сурет: Russia Today.