
Жалпы командалық есепте Ресей спортшылары топ бастаса, Иран мен Мысыр құрамалары үштікті түйіндеді.
Қанжығамызға алғашқы алтын медальді кумите бағдарламасы бойынша күшін сынаған Дінмұхаммед Айдарбек (U16-17) еншіледі. Ол 55 кг салмақта барлық қарсыласын айқын ұтты. Дінмұхаммед 2023 жылы осы Фуджейрадағы сайыстың қола жүлдегері атанған болатын.
14-15 жас санатында Нұрасыл Нұрсейіт (52 кг) пен Сұңқар Қанибек (70 кг) чемпион атанды. Нұрасыл финалдық сында украин спортшысын жеңсе, Сұңқар хорват қарсыласынан басым түсті.
Қыздар арасында Аяулым Тілектес (47 кг) 6 жекпе-жекте қарсыласын айқын ұтты. Халықаралық турнирдің қола медалін U21 жас санатында Ақниет Шеризат (55 кг), U16-17 жас санатында Гүлнұр Қойшыбай (59 кг), 14-15 жас аралығындағы жасөспірімдер додасында Әмір Кеңесбай (52 кг), Руслан Еркін (57 кг), Батыр Әділ (57 кг), 12-13 жас аралығындағы жеткіншектер сайысында Арнұр Мұрат (45 кг) пен Инсар Ахмадиев (50 кг) олжалады.
Фуджейрадағы турнирге 87 елден 2400-ге тарта спортшы қатысты. Елімізден 140 каратэ шебері бағын сынады. Жастар лигасының А сериясындағы келесі дода Испанияның Гвадалахара қаласында өтеді.