Жыл басынан бері Испания мен Сербияда өткен халықаралық турнирде еліміздің қосалқы құрамдағы былғары қолғап шеберлері өнер көрсеткен еді. Бұл жолы ұлттық командамыздың бас бапкері Қайрат Сәтжанов Балқан түбегіндегі бәсекеге ең мықты боксшыларды апаруды құп көрді. Олар – Теміртас Жүсіпов, Санжар Тәшкенбай (48 кг), Даниал Сәбит, Бекзат Алдамжаров (51 кг), Махмұд Сабырхан, Тимур Қабдешев (54 кг), Оразбек Асылқұлов, Дәулет Молдашев (57 кг), Талғат Сырымбетов, Серік Теміржанов (60 кг), Мұхаммедсабыр Базарбайұлы, Ертуған Зейнуллинов (63,5 кг), Төрехан Сабырхан, Санатәлі Төлтаев (67 кг), Абылайхан Жүсіпов, Фарух Тоқтасынов (71 кг), Сабыржан Аққалықов, Тимур Нұрсейітов (75 кг), Ерасыл Жақпеков, Азамат Бектас (80 кг), Нұрбек Оралбай, Бекзат Нұрдәулетов (86 кг), Данияр Рахымбердинов (92 кг), Айбек Оралбай, Нұрлан Сапарбай (+92 кг).
«Кіші әлем чемпионатына» баланған жарыста қазақ боксшыларының бірде-біреуі жеңіс тұғырының ең биік сатысына екі рет көтерілмеген. Софияда сол олқылықтың орнын толтыруға тәжірибелі Теміртас Жүсіпов пен Махмұд Сабырханның жақсы мүмкіндігі бар. Аталған қос саңлақ бұған дейін Болгарияда бас жүлдені олжалады. Теміртас 2013 жылғы, Махмұд 2023 жылғы додаларда дараланды. Сондай-ақ жанкүйерлер Төрехан Сабырханның шаршы алаңға шыққанын тағатсыздана күтеді. Себебі 18 жастағы дарынды боксшыға бұл ересектер арасындағы халықаралық деңгейдегі алғашқы сынақ.
Жексенбі күні аталған жарыстың жеребесі тартылып, нәтижесінде еліміздің үш боксшысы тұсаукесер кездесулерін Өзбекстанның өкілдеріне қарсы өткізетін болды. Серік Теміржанов Әбдімәлік Халоковпен күш сынасса, Төрехан Сабырхан Асадхужа Муйдинхуджаевпен айқасады. Екеуінің де Олимпиада, әлем чемпиондары деген атақтары бар. Бекзад Нұрдәулетов Акмалжон Исроиловпен қолғап түйістіреді.
Өзге жігіттеріміздің қарсыластары мыналар: Санжар Тәшкенбай – Руни Луис (Ирландия), Теміртас Жүсіпов – Субхан Мәмедов (Әзербайжан), Даниал Сәбит – Давит Жапаридзе (Грузия), Бекзат Алдамжаров – Ники Каммингс (Франция), Махмұд Сабырхан – Башким Бажоку (Косово), Тимур Қабдешов – Синьминь Ма (Қытай), Дәулет Молдашев – Залимхан Сулейманов (Әзербайжан), Оразбек Асылқұлов – Оуэн Харрис-Аллен (Уэльс), Талғат Сырымбетов – Тинко Банабаков (Болгария)/Юнбадари Ву (Қытай), Мұхаммедсабыр Базарбайұлы – Саба Ткебучава (Грузия), Ертуған Зейнуллинов – Владислав Лисовый (Болгария), Санатәлі Төлтаев – Емирджан Мехмед (Болгария), Фарух Тоқтасынов – Патрик Хьюитт (Англия), Абылайхан Жүсіпов – Олексий Ширяев (Украина), Сабыржан Аққалықов – Ремо Сальвати (Италия), Тимур Нұрсейітов – Расим Чобанли (Әзербайжан), Ерасыл Жақпеков – Умаис Икбал (Пәкістан), Азамат Бектас – Лаки Аймуфуа (Аустрия), Нұрбек Оралбай – Мануэль Жечев (Болгария), Данияр Рақымбердинов – Вагкан Нанитзанян (Грекия), Айбек Оралбай – Абдул Вахаб Тахир (Пәкістан), Нұрлан Сапарбай – Женвей Ванг (Қытай).
