Жақында Катонқарағай мектептерінің оқушылары орманшылармен бірлесіп, ыдысқа Сібір шыршасының тұқымын екті. Оқушылар әуелі аға буынның нұсқауымен шырша тұқымы бүршіктерден алып, арнайы ерітіндімен өңдеді, ең сапалы дегендерін іріктеп алды. Содан кейін барып, өздерінің есімі жазылған контейнерлерге отырғызды. Шаруа мұнымен аяқталмайды. Алдағы уақытта өскіндерді Катонқарағай ұлттық паркінің тұқым бағына отырғызып, инспекторлармен бірге күтім жасайды. Көшеттер өсіп-жетілген соң әркім өз көшетін мектеп аумағына көшіреді.
Жалпы, 2025 жылдың басынан бері мектеп орманшылықтарында 600-ге жуық тұқым отырғызылды. Жыл соңына дейін 1000 тұқым егу межеленген. Көктем шыға оқушылар акция аясында тұқымнан бөлек, 4000 дана сібір шыршасын отырғызуды жоспарлап отыр.
– Катонқарағай ұлттық паркінде барлығы 10 мектеп орманшылығы бар. Мектеп орманшылықтары өскелең ұрпақтың экологиялық мәдениетін қалыптастыру, табиғи мұраны сақтау, оқушыларды қоршаған ортаны қорғауға шақыру мақсатында құрылған. Мұнда оқушылар табиғат туралы теориялық білім алып қана қоймай, тәжірибе жағын да меңгереді, – дейді орманды қалпына келтіру инженері Гүлжаз Аманбаева.
Мектеп орманшылықтары табиғатты қорғау хақында тәрбие берумен қатар аумақтарды көгалдандыру, ормандарды қалпына келтіру, жергілікті тұрғындар арасында экологиялық құндылықтарды насихаттауда да үлкен жұмыс атқарады. Бұл акция әсіресе жаһандық экологиялық сын-қатерлер дәуірінде аса маңызды.
Шығыс Қазақстан облысы,
Катонқарағай ауданы
