Петропавлда тұрмыстық қалдықтарды төгетін орын жетіспейді

ПЕТРОПАВЛ. 10 ақпан. Петропавл қаласында қоршаған орта мен адам ағзасына зиянды тұрмыстық қалдық заттарды жинау, өңдеу мәселесі өткір күйінде қалып отыр. Бұл туралы облыстық кәсіпкерлер палатасының баспасөз қызметі хабарлады. Көп жылдан бері айтылып келе жатса да, шешімін таппай отырған түйткілді жайт кәсіпкерлер палатасының талқылауына шығарылып, табиғат ресурстары және табиғат байлықтарын реттеу басқармасы басшысының орынбасары Ерлан Әбуғалиевтың есебі тыңдалды. Оның айтуынша, облыс аумағында 583 тұрмыстық қалдық заттарын сақтайтын орын бар. Алайда, бұлардың 10-ы ғана барлық талаптарға жауап бере алады. Қалғандары жер учаскелеріне уақытша орналастырылған. Бір гектар жер телімін рәсімдеу 312 мың теңгені құрайды. Ал құрылыс жобаларын жасау, сараптамадан өткізу, рұқсат алу секілді міндетті шараларға жұмсалатын шығындарды есептесе, кемі 3,5 миллион теңгеден айналады. Сол себепті тұрмыстық қалдықтарды өңдеу жұмысымен айналысуға кәсіпкерлер тәуекел ете бермейді. Жиында бос жатқан жер учаскелерін тегін беру, Үкімет тарапынан қаржыландыру жайлы ұсыныстар айтылды. Өмір Есқали. Дерек: Солтүстік Қазақстан облыстық кәсіпкерлер палатасының баспасөз қызметі. Сурет: altaynews.kz.