
- АҚШ-тың Майами қаласында шымылдығы түрілген халықаралық турнирде еліміздің үш теннисшісі өнер көрсетеді. Алғашқы айналымда Александр Бублик аргентиналық Себастьян Баеспен күш сынасса, Елена Рыбакина мен Юлия Путинцева жарысты екінші кезеңнен бастайды. Елена Рената Сарасуа (Мексика) мен Эшлин Крюгер (АҚШ), Юлия америкалық Тэйлор Таунсенд пен Энн Ли арасындағы тартыстың жеңімпазымен кездеседі. Михаил Кукушкин мен Александр Шевченко іріктеу сайыстарында сүрінді.
- Осы аптада «Астана» велоклубын үш бірдей дүбірлі дода күтіп тұр. Франция мен Бельгиядағы бәсекеде Кейс Бол, Аарон Гейт, Макс Кантер, Микеле Гадзоли, Алессандро Ромеле бақ сынайды. Италияда өтетін «Милан-Турин» сайысында Альберто Беттиоль, Давиде Баллерини, Никола Кончи, Лоренцо Фортунато, Харольд Мартин Лопес, Харольд Техада, Диего Улисси сайысқа түседі.
- Қазақ бадминтоншысы Камила Смағұлова мен ұлыбританиялық Рохан Хилл Куба астанасы – Гаванада ұйымдастырылған «Torneo Internacional Giraldilla» турнирінің жұптық сайысында күміс медаль иеленді. Ақтық сынға алқынбай жеткен олар финалда гватемалалық Диана Сото мен Кристофер Сальвадорға жол берді.
- UFC тарихында ең көп табыс тапқан аралас жекпе-жек шеберлерінің тізімі жарияланды. Бай-қуаттылар көшін Конор Макгрегор бастап тұр. Ирландияның мақтанышы өз карьерасында 39,3 миллион АҚШ долларын иеленді. Екінші орындағы Дағыстанның мықтысы Хабиб Нұрмагомедов 22,9 миллионды еншіледі. Үздік үштікті Джон Джонс түйіндеді. Америкалық арланның табысы – 17,2 миллион. Сондай-ақ ТОП-10-дықтың қатарында Алистар Оверим (14,4 млн доллар), Стипе Миочич (13,6 млн доллар), Андерсон Силва (13,5 млн доллар), Брок Леснар (13,2 млн доллар), Алекс Перейра (12,5 млн доллар), Исраэль Адесанья (11,5 млн доллар), Андрей Орловский (11,2 млн доллар) сынды көкжалдар бар.