Мәулен Әшімбаев өз сөзінде азық-түліктің тапшылығы мен аштық қазіргі таңда жаһандық күн тәртібіндегі ең өзекті мәселелердің бірі екенін айтты. Біріккен Ұлттар Ұйымының мәліметтеріне сәйкес әлемде 340 миллионнан аса адам азық-түліктің жетістпеуінен зардап шегіп отыр. Ал 2 миллионға жуық адам аштықтың алдында тұр.
Осы ретте қазіргідей геосаяси шиеленіс және экологиялық қатерлер жағдайында Қазақстанның бастамасымен құрылған Азық-түлік қауіпсіздігі жөніндегі ислам ұйымының қызметі ерекше маңызға ие болып отыр.
«Президент Қасым-Жомарт Тоқаев азық-түлік қауіпсіздігін қамтамасыз ету Қазақстанның алдында тұрған стратегиялық міндеттердің бірі екенін айтты. Бұл бағытта Азық-түлік қауіпсіздігі жөніндегі ислам ұйымы жаһандық азық-түлік мәселелерін шешу жолында маңызды рөл атқарады. Біз ұйымның гуманитарлық дағдарысқа ұшыраған елдерге, оның ішінде Ауғанстан тұрғындарына көмек көрсету жөніндегі бастамаларын жоғары бағалаймыз», деді М.Әшімбаев.
Кездесу барысында Мемлекет басшысының тапсырмасымен Қазақстанда ауыл шаруашылығы саласын мемлекеттік қолдау және халықты қолжетімді әрі сапалы азық-түлікпен қамтамасыз ету бағытында жүйелі шаралар қабылданып жатқаны айтылды. Соның аясында Сенат депутаттары еліміздің азық-түлік тәуелсіздігін нығайту мәселесін басты назарында ұстап келеді.
Сонымен қатар тараптар Орталық Азия елдерінің агроклиматтық жағдайы, экологиялық проблемалары және экономикалық байланыстары ұқсас екеніне назар аударып, ортақ тәсілдерді әзірлеу үшін аймақтағы ынтымақтастықты арттыру тетіктерін талқылады.
Сондай-ақ Сенат төрағасы Бахрейнде ұйымдастырылған халықаралық конференция аясында діни лидерлермен болған кездесулердің қорытындыларына назар аударды және Берік Арынды 2025 жылғы 17-18 қыркүйекте Астанада өтетін «Діндер диалогы: болашақ жолындағы синергия» атты Әлемдік және дәстүрлі діндер лидерлерінің VIII Съезіне қатысуға шақырды.
