Қазақ хандығының тұсында бұл жерге жыл сайын хан-сұлтандар, би-шешендер мен батырлар жиылып, елдің тыныштығын сақтау, көші-қон тәртібін реттеу, жаудан қорғану, басқа да маңызды мәселелерді талқылаған. Осы жерде қабылданған «Жеті жарғы» заңдар жинағы елдің бірлігін нығайтып, қазақ халқы тарихында қабылданған алғашқы Конституциясы болды десек қателеспейміз.
Акция барысында Қазақстан халқы Ассамблеясының мүшелері, этномәдени бірлестіктердің басшылары, зиялы қауым өкілдері, студенттер мен қала тұрғындары «Мәртөбе» тарихи кешенінің аумағында тазалық жұмыстарын жүргізіп, абаттандыруға атсалысты. Қалалық ҚХА жанындағы Ақсақалдар кеңесінің мүшесі Досыбай Шерімқұлов акцияның маңыздылығы туралы атап өтіп, жиналған жұртшылықты Наурыз мерекесімен құттықтады.
«Мәртөбе – халықтық биліктің қайнар көзі әрі дала Парламентінің рөлін атқарған қасиетті орын. Қазақ хандығы кезеңінде мұнда «Жеті жарғы» заңдар жинағы қабылданғаны тарихтан белгілі. Ол кейін қазақ халқының тұрмыс салтындағы құқықтық қатынастардың түзілуіне үлкен жол ашты. Заң-ережелер арқылы еліміздің бірлігі нығайып, біртұтас тәртіп орнады. Жасыратыны жоқ, кешегі сол тарихи құжат негізінде елдігімізді айғақтайтын қазіргі Конституциямыз қалыптасты. Мәртөбе біздің тәуелсіздігіміз бен бірлігіміздің тұғырлы белгісі ретінде қастерленуге тиіс. Сондықтан мәдени ескерткіштің қалпын бұзбай оның тарихтағы рөлін, рухани құндылығын келер ұрпаққа жеткізу – басты міндетіміз. Сонымен бірге барша ағайынды дәстүрлі мерекемен құттықтаймын», деді еңбек ардагері.
