Суреттерді түсірген – Ақәділ РЫСМАХАН
Қоршаған ортаны қорғау, экологиялық мәдениетті қалыптастыру мақсатында қолға алынған акция аясында «Бәйтерек» шағын ауданындағы №3 мектеп-лицей маңына 150 көшет отырғызылды. «TazaLike» акциясы содан соң еліміздегі ең ірі шағын аудан санатына енген «Ұлы дала» ықшам ауданында жалғасты. Ресми дерекке сүйенсек, «Ұлы дала» шағын ауданында 500 дана көшет егілді.
«TazaLike» акциясы одан әрі «Таза қала» іс-шарасына ұласты. Тараз, Жаңатас, Қаратау, Шу қалаларының тұрғындары бұл күні күл-қоқыстарды шығарып, арық-атыздар мен арналарды қоқыстан тазартты.
Облыс әкімдігі баспасөз қызметі келтірген дерекке жүгінсек, «TazaLike» акциясы 20 сәуірге дейін жалғасады. Оған өңірдің барлық ауданы үлес қосады. Өңір басшысының орынбасары Қанатбек Мәдібектің айтуынша, «Таза Қазақстан» экологиялық акциясы аясында биылғы жылы да ауқымды жұмыс атқарылады. Өңірде көгалдандыру жұмысына 1,2 млрд теңге қаржы қарастырылған.
«Облыс орталығы Тараз қаласында «Jambyl Cement» компаниясының ықпал етуімен 3,6 мың, «Тараз металлургиялық зауыты» ұжымының қолдауымен 10 мың көшет отырғызу жоспарланған», дейді Қ. Мәдібек.
Сарысу ауданы аумағында орналасқан «Qazaq soda» компаниясының өкілдері 27 мың көшет отырғызуды меже тұтып отыр. Жергілікті әкімдіктің ықпал етуімен басталған бастама аясында ұжым экомәдениетті қалыптастыруға, сақтауға барынша үлес қоспақшы. Жалпы, экологиялық акцияға үлес қосуға бекінген бірқатар компания мен зауыт өкілдерінің көп күттірмей, іске қызу кірісіп жатқаны көңіл қуантады.
Наурызнаманың тазару күні аясында да бірқатар жұмыс атқарылды. Саябақтар мен көшелерде тазарту жұмысы жүргізілді. Облыстық жастар ресурстық орталығының ықпал етуімен, «Жасыл ел» еріктілерінен жасақталған жастар облыс орталығындағы «Денсаулық» саябағындағы арық-атызды, күре жол бойындағы күл-қоқысты тазалады.
Өңірдегі көгалдандыру жұмысы ілкі сәтке де тоқтамақ емес. Биыл Тараз қаласы мен аудандарда 195 мың көшет отырғызу жоспарланған екен. Сондай-ақ егілген көшеттерді цифрландыру жұмысы да жоспарға сай жүзеге асырылып жатыр.
«Жалпы алғанда бүгінгі күнге дейін «Болашақты бірге отырғызамыз» акциясын өткізіп үлгердік. Нәтижесінде, 28,9 мың көшет егілді. Оған 381 мектептің 47,8 мың білім алушысы атсалысты. Қолға алынған «Үлгілі ауыл», «Үлгілі аула» байқаулары арқылы өңір тұрғындарының қоршаған ортаға қамқорлықпен қарауына ден қою жоспарымызда бар», дейді Қ.Мәдібек.
Жақында жоспарға сәйкес Тараз қаласындағы «Әулиеата» ауданында «Таза аула – таза қала» акциясы өткізілді, өңірдің бірқатар ауданында «Таза аула» іс-шарасы ұйымдастырылды. Нәтижесінде, үздіктер анықталып, марапатталды.
Жалпы алғанда, өңірде «Таза Қазақстан» экологиялық акциясы аясында бірқатар ауқымды іс-шара өткізу көзделген. Санитарлық тазалық, абаттандыру, көгалдандыру жұмысына 8,3 млрд теңге сомасында қаражат қарастырылған. Бөлінген қаржы есебінен тарихи-мәдени ескерткіштердің төңірегін, саябақ пен сквер аумағына тазалық жұмысын жүргізуге, абаттандыру жұмысын іске асыруға басымдық берілмек.
«Өңірдің «Жасыл белдеу» жоспарына сәйкес атқарылатын жұмыс аз емес. Биыл 195 мың жасыл желек отырғызылады. Сондай-ақ егілетін көшеттерді күтіп ұстау, оларды суару жүйесімен қамтамасыз ету, қоршау орнату жұмыстары да басты назарда болады.
Өңірдің елді мекендеріндегі жасыл желекті күтіп-ұстау, қорғау қағидаларына сәйкес, Тараз қаласындағы ағаштарды цифрландыру мақсатында 40 млн теңге қаралып, 48,6 гектар аумақтағы 30 018 дана тал-дарақ есепке алынды», дейді Қ.Мәдібек.
Жамбыл облысы
