Жарыстың қысқа бағдарламасында Михаил Шайдоров асқан шеберлігімен тәнті етті. 20 жастағы алматылық өрен 94,77 ұпай жиып, үшінші орынға табан тіреді. Егер аса күрделі әдіс – үштік аксельді орындау барысында қолы мұзға тимеген жағдайда жерлесіміздің өнері бұдан да жоғары бағаланатын еді. Десек те осы нәтиженің өзі Шайдоровқа Бостонда үздіктер қатарына қосылып қана қоймай, Олимпия ойындарының жолдамасына иелік етуге жеткілікті болды.
Бәсеке аяқталған бетте БАҚ өкілдеріне сұхбат берген Михаил: «Соңғы дайындық жұмыстарын Вашингтонда өткіздім. Басында біраз қиындық болды. Ұйқы келмеді, толқыдым, қобалжыдым. Бірақ ол үйреншікті нәрсе. Ең бастысы, соның барлығын жеңе білдім. Бұл спорттық мансабымдағы ең қиын сырғанау болды. Соған қарамастан алға қойған жоспарым жүзеге асты. Алда бүгінгіден де ауыр сынақ күтіп тұр. Егер еркін бағдарламада қателікке бой алдырмасам, көздеген мақсатыма қол жеткіземін», деп ағынан жарылды.
Қысқа бағдарламаның қорытындысы бойынша америкалық Илья Малинин көш бастады. Былтырғы жылғы әлем чемпионы 110,41 ұпай олжалады. Екінші орында – Юма Кагияма. Олимпия мен Азия ойындарына бір мәрте, әлем чемпионаттарында үш рет күміспен күптелген Жапонияның жұлдызы 107,09 ұпайды еншіледі.
Әйелдер арасында бақ сынаған Софья Самоделкина да жаман сырғанаған жоқ. Десек те оның орындаған элементтерінің күрделілігі кемшін соғып жатыр. Соның салдарынан қысқа бағдарламаны 13-орынмен қорытындылады. Жиған ұпайы – 63.58. Бұрымдылдар бәсекесінде америкалық Алиса Лю (74.58 ұпай) бірінші орында тұр. Жапониялық Монэ Тиба (73.44 ұпай) мен АҚШ-тың тағы бір өкілі Изабо Левито (73.33 ұпай) екінші, үшінші сатыға жайғасты.
