Фото: Мәдениет және ақпарат министрлігі
Нұрғиса Тілендиевтің 100 жылдығына орай Қазақстан мен түркі елдерінде концерттер, ғылыми конференциялар және басқа да мәдени шаралар өтеді. Мерейтой ЮНЕСКО деңгейінде де атап өтіледі.
Еске салайық, 2025 жылдың 1 сәуірінде қазақтың біртуар композиторы, күйші, дирижер, халық әртісі Нұрғиса Тілендиевтің туғанына 100 жыл толып отыр.
Ол Алматы облысы Іле ауданында дүниеге келген. Күй-әндерінен бөлек Нұрғиса Тілендиев 50-ден астам драмалық қойылымға, 19 көркем фильмге, 17 мультипликациялық фильмге, 14 деректі-хроникалық фильмге музыка жазған.
Нұрғиса Атабайұлы әртүрлі жылдары Абай атындағы Қазақ мемлекеттік академиялық опера және балет театрының дирижері, Қазақтың халық аспаптар оркестрінің бас дирижері, Қазақфильм киностудиясы музыка редакциясының бас редакторы, 1981 жылдан Отырар сазы фольклорлық-этнографиялық ансамблінің ұйымдастырушысы әрі көркемдік жетекшісі қызметтерін атқарған.
