Фото: Мәжіліс
Қарақат Жақсылыққызының айтуынша, депутаттар ауыл тұрғындарымен кездесулерде механизаторлар, агрономдар, сауыншылар, ветеринарлар жетіспеушілігі туралы шағымдарды естиді екен.
«Салада 60 мыңнан астам маман жетіспейді. Әрбір үшінші ферма кадр тапшылығын бастан өткеріп отыр, әсіресе Солтүстік Қазақстан, Ақтөбе, Жамбыл, Алматы облыстары. Жастар ауылдан кетіп жатыр», деді депутат.
Қ.Әбденнің пікірінше, бүгінде жастарды оқытып қана қоймай, олар өздерінің қабілеттерін туған жерінде іске асыруы үшін жағдай жасалуы қажет.
«Мамандарды даярлаудың негізі «Қай жерде туған - сол жерде пайда болды», қағидаты болуы тиіс. Шешім – мектептерде агрокәсіптік білім беру енгізіліп, 7-11 сыныптар аралығында оқушылар механикаландыру, агрономия, ветеринария, мал шаруашылығы және агробизнес негіздерін үйренуі қажет», деді Мәжіліс депутаты.
Депутаттың айтуынша, мектептерде агропрофильді оқыту нәтижелі болар еді. Ерте кәсіптік бағдар арқылы оқушылар сұранысқа ие мамандықтарға ие болады. Теория жергілікті ауыл шаруашылығы кәсіпорындарында практикамен бекітіледі. Сол ауыл жергілікті шаруашылықтың ерекшеліктерін білетін мамандарды алады.
Мәжілісменнің айтуынша көп елдерде ауыл шаруашылығы үшін кадрлар даярлау – мектептен басталады.
«Германияда оқушылар ауыл шаруашылығы кәсіпорындарында тәжірибеден өтеді, ал мемлекет олардың оқуын субсидиялайды. Канадада агромектептер заманауи технологияларға басымдық бере оқытып, кадрлар тапшылығын едәуір азайтып отыр. Австралияда ауыл шаруашылығын жүргізу үшін жеңілдетілген несиелер-гранттар арқылы мектеп түлектеріне қолдау көрсететін «Өз өңіріңде оқы және жұмыс істе» бағдарламасы енгізілген», деді депутат Қ.Әбден.
Депутаттың көзқарасынша, аталған халықаралық тәжірибе, яғни, орта мектептерде кадрларды жүйелі даярлау – ауыл шаруашылығын дамытудың жалғыз тиімді жолы. Сол орайда, Үкіметке ұсыныстарын айтты.
«1. Білім министрлігі – ауылдық мектептерде агропрофильді оқытудың мемлекеттік бағдарламасын әзірлесін.
- Ауыл шаруашылығы министрлігі – мектептердің дуальді оқыту үшін ауыл шаруашылығы кәсіпорындарына қолжетімділігін қамтамасыз етсін.
- Еңбек және халықты әлеуметтік қорғау министрлігі – АӨК-де жұмыс істеуге дайын түлектер үшін жеңілдіктер мен гранттар жүйесін енгізсін.
- Ұлттық экономика министрлігі – бұл бағдарламаны ауылды дамыту жөніндегі ұлттық жобаларға енгізсін», деп сауалын аяқтады депутат.
Қарақат Әбден «Ауыл» фракциясы атынан Үкіметті мәселені шешуді кейінге қалдырмай, қысқа мерзімде мектептерде агроөнеркәсіптік білім беруді енгізу жөнінде нақты шаралар ұсынуға шақырды.
