Суретті түсірген – Азамат Шарипов
Бұл жолғы жарыстың шарты мен жүйесі ерекше болды. Жас шектеуі болғанымен, арулардың ұлтына, нәсіліне әлбетте қарамаған. Тіпті аяулы жар, асыл аналар да қатысты. Тек қана жастары 21-35 жас аралығында болуы шарт. Жеңімпазға 1 млн теңге ақшалай сыйлық пен шебердің қолынан шыққан сәнді сәукеле тігілді. Ол үшін сынға түскен сұлулар сан түрлі кезеңнен өтті. Әртістік қабілеттерін көрсетті, ұлттық құндылықтарды қаншалықты білетіндерін байқатты. Фотоға түсіп, камера алдында өздерін ұстауды да бағалады. Сүрінгендері сайыстың шартына сәйкес шығып отырды. Әуелде 80 ару тізімделгенімен, ақтық сайыста он ару ғана ортаға шыққан. Бұл күні бәрі бар өнерлерін салды. Ән де айтылды, би де биленді. Таланттарына таңғалған қазылар ұпайларын арттырды. Айта кетерлігі, сайыстың әділ өтуі үшін әр кезең сайын қазылар ауысып отырған. Ал арулар үлкен жауапкершілікпен, жеңіске деген ұмтылыспен қатысып жатты.
– Қазақтың өнерін, ұлттық құндылықтарын, мәдениетін паш етуді мақсат еттік. Аруларымыз ұлттық құндылықтарды дәріптеуге тырысты. Ондыққа енген қыздардың тоғызына 100 мың теңгенің сертификаты және жеңімпазға 1 млн теңге сыйақы қарастырылған, – деді қалалық мәдениет және тілдерді дамыту бөлімінің бастығы Алмаз Нұрғалиев.
Сөйтіп, өнерлер ортаға салынып, көрермендер қиқу қосып болған соң қазылар ақылдасуға кеткен. Дәл осы сәтте ғой, арулар да, оларды қолдап келген жанкүйерлер де тағат таппаған. Жүргізушілер ортаға шығып, аталымға ие болғандарды марапаттап болғанша сұлулардың жан-дүниесі алай-дүлей болған шығар. Себебі әркім өзіне жеңіс тіледі. Қысқасы, «Өскемен аруы-2025» байқауының жеңімпазы сексен қыздың арасынан суырылып шыққан сұлу Зинаида Бектемірова болды. Халық қошеметтеді, қиқу қосты, қол соқты. Былтырғы Өскемен аруы шебердің қолымен зерленген сәукелені Зинаидаға кигізді.
– Күтпеген жеңіс болды. Бірге қатысқан арулардың барлығына сәттілік тілеймін, – деді Зинаида Бектемірова.
Айта кетейік, Зинаида Ақтөбе облысының тумасы, Шығыстың келіні. Облыстық драма және оперетта театрында жұмыс істейді.
ӨСКЕМЕН
