Мемлекет басшысының тапсырмасын іске асыру мақсатында Ресей Ғылым академиясы және жетекші ғылыми зерттеу институттарымен бірлесіп ашылған орталық екі елдің ғылыми зерттеу институттарымен тығыз ынтымақтастықта жұмыс істейді. Онда ғалымдар тәжірибе алмасып, инновациялық шешімдер әзірлеумен айналысады. Мамандардың пікірінше, орталық ауыл шаруашылығына жоғары технологиялық тәсілдерді енгізуде бірегей платформаға айналады.
Орталықтың ашылу салтанатында Президент жанындағы Ұлттық ғылым академиясының президенті А.Күрішбаев, Ресей Ғылым академиясының вице-президенті П.Чекмарёв, Ресейдің Қазақстандағы елшілігінің кеңесшісі Д.Десов құттықтау сөз сөйлеп, екі елдің ғалымдары ортақ жобаның таяу болашақтағы мүмкіндіктері туралы пікірлерімен бөлісті.
«Екі елдің географиялық жақындығы өзара тиімді экономикалық және сауда қатынастарының дамуына ықпал етеді. Бізде табиғи-климаттық жағдайлар мен экономикалық мүдделер ұқсас. Бұл аграрлық секторда ынтымақтастық үшін тиімді мүмкіндік туғызады. Қазақстан мен Ресей үлкен табиғи ресурстарға ие бола отырып, жаһандық азық-түлік қауіпсіздігін қамтамасыз етудегі негізгі ойыншылар саналады. Осыған байланысты аграрлық сектор саласындағы ынтымақтастық табиғи ерекшелігімізді ескере отырып, азық-түлік өндірісін ұлғайтуға ғана емес, сонымен қатар аграрлық саладағы технологиялық үдерісті жеделдетуге, ауыл шаруашылығын жаңа сапалы деңгейге шығаруға мүмкіндік береді. Ресей Ғылым академиясы – ғылыми және технологиялық салаларда ынтымақтасатын жақын және сенімді серіктес. Біздің ынтымақтастығымыз өзара сенім мен ортақ мақсаттарға ұмтылуға негізделген, бұл даму мен нығайтуға ықпал етеді», деді ҰҒА президенті Ақылбек Күрішбаев.
Агроөнеркәсіп кешені орталығында ауыл шаруашылығы дақылдарының геномдық селекциясы саласындағы бірлескен ғылыми зерттеулері мен жобаларды дамытып, өнімділігі жоғары және климаттың өзгеруіне және ауруларға төзімді жаңа сорттар жасаумен қатар сорт сынақтарын жүргізеді. Сондай-ақ мұнда генетикалық модификацияның озық әдістерін әзірлеп, тұрақты және экологиялық таза өнімдер жасау үшін биотехнологияларды пайдалануға қатысты зерттеу жұмыстары іске асады. Сонымен қатар ғалымдар ауыл шаруашылығының тиімділігін арттыру үшін инновациялық технологияларды енгізу мақсатында агроөнеркәсіптік кешенде цифрлық технологияларды дамытып, оның ішінде мониторинг жүйелері, автоматтандыру және оңтайлы шешімдер қабылдау үшін үлкен деректерді талдауға қатысты жобаларды да жүзеге асырады.
АЛМАТЫ
