Келесі сәрсенбіде депутаттарға Салық кодексі және оған ілеспе салық мәселелері бойынша түзетулер жобасын бірінші оқылымда қарау ұсынылады. Салық кодексі жобасын Үкімет Мемлекет басшысының 2022 және 2023 жылдардағы Қазақстан халқына арнаған Жолдауларында берілген тапсырмаларды орындау мақсатымен әзірлеген. Ол 822 баптан тұрады және қазіргі Салық кодексі мен оны қолданысқа енгізген заңның күшін жояды.
Кодекс жобасында кейбір салалардағы салық төлеушілер үшін корпоративтік табыс салығы мөлшерлемесін саралау, өңдеу өнеркәсібін дамытуға және пайданы жаңғыртуға қайта инвестициялауды ынталандыру мақсатымен салықтық шегерімдерді кеңейту көзделген.
Сондай-ақ салықтар мен бюджетке төленетін басқа да міндетті төлемдердің санын қысқарту, барлық арнайы салықтық режімдерді оңтайландыру, салық жеңілдіктерін беру жүйесін бақылау мен талдаудың жаңа тәсілдерін енгізу, қымбат мүлікке, алкоголь және темекі өнімдеріне салық мөлшерлемелерін арттыру ұсынылады. Салықтық әкімшілендіруді жетілдіруге бағытталған басқа да бірқатар норма мен шара қарастырылған.
Ал ілеспе заң жобасы аясында 3 кодекс пен 19 заңға өзгерістер енгізу ұсынылады.
Осы күні депутаттар қаржы нарығын дамыту және қаржылық қызметтерді тұтынушылардың құқықтарын қорғау мәселелері жөніндегі заң жобасын екінші оқылымда қарайтын болады. Заң жобасын талқылау барысында депутаттар бірнеше норма ұсынды. Атап айтқанда, тұтынушылық кепілсіз онлайн-несиелер беру кезінде «салқындату кезеңін» (жиырма төрт сағат) енгізу, сондай-ақ несие алуға алғаш рет жүгінген азаматтардың банк немесе микроқаржы ұйымының бөлімшесіне жеке келуін міндеттеу мәселелері көтерілді.
Сонымен қатар азаматтардың жекелеген санаттарына кепілсіз тұтынушылық қарыздарды олардың «электрондық үкімет» порталы арқылы ресімделген келісімінен кейін ғана беру талаптары қарастырылған (21 жасқа толмаған және 55 жастан асқан азаматтарға).
Бұған қоса халық қалаулылары алаяқтық операцияларға қарсы іс-қимыл шараларын күшейтуге бағытталған, оның ішінде антифрод-орталықтың қызметіне және қарыз алушылардың құқықтарын қорғауға байланысты бірқатар норма ұсынды.
Жалпы, отырыста құқық бұзушылықтардың алдын алу және ғылымды қажет ететін аймақтарды дамыту мәселелері бойынша жаңа заң жобалары жұмысқа қабылданбақ.
