Ақтөбе облысында медресе шәкірттері спорттық жарыс өткізді

АҚТӨБЕ. 5 мамыр. Ақтөбе облыстық орталық «Нұр-Ғасыр» мешіті жанындағы «Ақтөбе» медресесінің шәкірттері мереке күндері спорттық ойындардан жарыс өткізді. Бұл туралы «Нұр-Ғасыр» мешітінің баспасөз қызметі хабарлады. Шара медресенің 7 жылдық мерейтойына арналды. Жастардың спорттық шеберлігін шыңдау және бұқаралық спортты насихаттау мақсатында ұйымдастырылған сайыс Алға ауданының Бестамақ ауылы мен Алға қаласында өтті. Қатысушылар волейбол, қол күрестіру, гір көтеру, арқан тартыс, шағын футбол, қазақ күресі, құнан бәйге және асық ату сынды спорт түрлерінен сынға түсті. Бүгінде аталған медреседе 65 шәкірт білім алуда. Биыл бітіретін шәкірттерідің алтауы қызыл дипломнан үміткер. Қазақстан мұсылмандары діни басқармасының арнаулы сараптама комиссиясы медресе ұстаздарының білімі мен біліктілігін тексеріп, жоғары бағалады. Сондай-ақ, осы жылы Алматыда өткен республикалық медресеаралық олимпиадада «Ақтөбе» медресесінің 2-курс шәкірті Әбдіжаппар Саламаттың 1-орынды жеңіп алғанын айта кетейік. Сатыбалды Сәуірбай. Дерек: Ақтөбе облыстық орталық «Нұр-Ғасыр» мешітінің баспасөз қызметі. Сурет: muftyat.kz.