Ең жас Ұлыбритания ханшайымының есімі белгілі болды

АСТАНА. 5 мамыр. Ұлыбритания ханзадасы Уильям мен оның әйелі Кейттің 2 мамырда туған қыздарының есімі белгілі болды. Ең жас ханшайымға Шарлотта Елизавета Диана деген есім берілді. Бұл туралы euronews.com хабарлады. Кенсингтон сарайы таратқан мәліметке сүйенсек, сәбиді үлкен әжесі – патшайым Елизавета ІІ арнайы көргеннен кейін, ат қою рәсімі өткен. Диана – Уильям ханзаданың анасының есімі екені белгілі. Патшайым отбасында қалыптасқан дәстүр бойынша жаңа туған сәбидің есімін екі күннің ішінде қою өте тез болып саналады. Бұған дейін кішкентай ханшайымның ағасы Джордждың есімі де екі күннің ішінде қойылған еді. Ал олардың әкелері – 1982 жылы туған Уильям ханзаданың есімі көпшілікке бір аптадан соң белгілі болды. Сондай-ақ, 1948 жылы туған Чарльз ханзаданың есімі де ұзақ уақыттан кейін, яғни, туғанына бір ай өткен соң жарияланған. Шарлотта Елизавета Диана ханшайым дүниеге келген күннен бастап ресми түрде Ұлыбритания тағының төртінші мұрагері болды. Сәбидің өмірге келгенін барлық жексенбілік басылымдар жарыса жазып, оның құрметіне зеңбіректен оқ атылды. Айта кетейік, кішкентай ханшайымның есіміне байланысты жергілікті букмекерлік кеңселер бәс қабылдаған болатын. Соның нәтижесінде Шарлотта, Елизавета, Алиса және Виктория есімдері көш бастаған. Еламан Қоңыр. Дерек: euronews.com. Сурет: ria.ru.