ТАРАЗ. 5 мамыр. Жамбыл облысы Мойынқұм ауданының орталығында спорт кешені ашылды. Бұл туралы egemen.kz тілшісі хабарлады.
Жалпы құны 262,0 млн. теңгені құрайтын бұл кешеннің құрылысы 2014 жылдың сәуір айында басталған. Ғимаратта үлкен спорт залы, күрес залы, сондай-ақ спортшыларға арналған киім ауыстыру, жуыну бөлмелері бар. Екінші қабатта спорт мектебінің әкімшілік корпусы орналасқан. Кешеннің үлкен спорт залы 200 көрерменге арналған.
Сонымен қатар, спорт кешенінің аумағында жасанды төсеніші бар 2 спорт алаңшасы, шағын футбол алаңшасы және волейбол, баскетбол ойындары үшін арналған алаңшалар қарастырылған. Спорт кешенінде қазақ күресі, еркін күрес, волейбол, баскетбол, футбол және бокс сияқты секциялар бар. Қазірдің өзінде бұл секцияларда 100-ге жуық спортшы шынығуда.
Жаңа спорт кешенінде облыстық, республикалық және халықаралық спорттық іс-шаралар өткізуге мүмкіндік бар.
Оралхан Дәуіт.
Дерек, сурет: egemen.kz.
