Фото: @EmmanuelMacron
Ел басшылары бейбіт тұрғындарды қорғау мен зардап шеккен аймақтарға гуманитарлық көмектің кедергісіз жетуін қамтамасыз етудің маңыздылығын атап өтті.
Саяси жиынға Мысыр Президенті Абдель Фаттах ас-Сиси, Франция Президенті Эммануэль Макрон және Иордания Королі Абдалла II қатысты.
Үш елдің басшылары 19 қаңтарда жасалған қауіпсіздік шараларын қамтамасыз ете отырып тұтқындарды босату жөніндегі келісімді жедел іске асыру қажеттігін баса айтты.
Мәлімдемеде бейбіт тұрғындарды, сондай-ақ гуманитарлық қызметкерлерді қорғау мен гуманитарлық көмекті кедергісіз жеткізуді қамтамасыз ету – халықаралық құқық бойынша міндет екені және бұл нормалар міндетті түрде сақталуы керектігі атап өтілді.
Сондай-ақ, басшылар Батыс жағалауы мен Шығыс Иерусалимдегі жағдайдың ушығуына алаңдаушылық білдіріп, екі мемлекет негізіндегі шешімді жүзеге асыру мүмкіндігін жоққа шығаратын және шиеленісті күшейтетін біржақты әрекеттерді тоқтатуға шақырды.
Олар Иерусалимдегі қасиетті орындарға қатысты тарихи мәртебесін құрметтеуге үндеді.
Макрон, Абдалла II және ас-Сиси палестиналықтарды күштеп көшіруге немесе палестиналық аумақтарды аннексиялауға қарсы ұстанымдарын растады, сондай-ақ халықаралық қауымдастықты Мысыр ұсынған Газа секторын қалпына келтіру жөніндегі араб-ислам жоспарына қолдау көрсетуге шақырды.
Бұл бірлескен мәлімдеме Газадағы жағдайдың ушығуына байланысты жасалды. Жақында болған әскери қақтығыстар көптеген бейбіт тұрғындардың қаза болуына және инфрақұрылымның жаппай бұзылуына әкелді. Халықаралық қауымдастық қақтығыстың шиеленісуіне алаңдаушылық білдіріп, оны дереу реттеуге бағытталған нақты шараларды қолға алуға шақырып жатыр.
