Қол күресінен ауқымды іс-шара Шардара ауданының құрылғанына 60 жыл толуына орай ұйымдастырылды. Шараның салтанатты ашылуында «Шардара Армспорт» клубының негізін қалаушы, Шардара ауданының әкімі Арман Қарсыбаев сөз сөйлеп, жиналған көпшілікті ауданның мерейтойымен құттықтады. Сондай-ақ қол күресі арқылы қазақ елін, оның ішінде ауданды дүниежүзі танығанын атап өтті.
«Оның бір дәлелі шағын ғана ауданымыздан 120-дан астам Әлем чемпионы шықты. Сонымен қатар, бүгін бір ғана Шардара ауданының қол күресшілері Өзбекстан Республикасының құрамасына қарсы жекпе-жек өткізіп отыр», деді Арман Романұлы.
Ашылу салтанатынан соң 9 салмақ дәрежесінде 9 жұп күш сынасты. Тартысты өткен бәсекеде «Шардара Армспорт» клубы тағы да өздерінің мықтылықтарын дәлелдеп, Өзбекстан құрамасын 9:0 есебімен тізе бүктірді. Жеңімпаздарға арнайы марапаттар табыс етілді.
