Головкин жаттығуды бастайды

WBA (Super), IBO и WBC (Interim) тұжырымдары бойынша орта салмақтағы әлем чемпионы Геннадий Головкин өзінің жаттығу лагеріне оралып, 17 тамыздан бастап жаттығуларына кіріседі. Бұл туралы оның бапкері Абель Санчес хабарлады. «Біздің келесі жекпе-жек 17 қа­зан­­да өтеді. Оған дейін Голов­кин­ге ты­нық­қан жөн», – деді бокс­шы­ның жеке бапкері. Еске салар болсақ, 17 қазан күні Нью-Йорктегі атақты Madison Square Garden сарай­ында өтетін жекпе-жекте Ген- надий Головкин қанадалық былғары қолғап шебері, IBF титулының иегері Давид Лемь­емен жұдырық түйістіреді. Атал­ған жекпе-жек HBO теле­ар­насы арқылы көрсетіледі. Қазақстандық спортсүйер қауым бұл айқасты «Қазақстан» телеарнасынан тіке­лей эфирде тамашалай алады. Әзірге кәсіби рингте жеңі­лістің ащы дәмін татпаған Головкиннің үлесінде 33 жеңіс бар және ол оның 30-ын нокаутпен аяқтады. Ал Лемье болса, 34 рет жеңіске жетіп (31 нокаут), екі жекпе-жекте ғана қар­сыластарына есе жіберген. Қайрат ӘБІЛДИНОВ, журналист. Қарағанды.