Қазақ-түрік телехикаясы

Қазақстан мен Түркия мемлекеттері  арасында ортақ телехикая түсіру туралы келісімге қол жеткізілді. Түрік жағы оған қолдау біл­діріп, жан-жақты көмек көр­сетуге әзір екен­діктерін мәлім­деді. Ол туралы жақында Қа­­зақ­стан Республикасының Түр­­ік Рес­­публикасындағы Төтен­ше және өкі­летті елшісі Жан­сейіт Түймебаевтың Түркия­ның мемлекеттік TRT теле­­ра­диокорпорациясының бас­шылығымен болған кездесуі барысында белгілі болды. Сонымен қатар, мұнан былайғы уақытта қазақстандық телеөнімдер Түр­кияда көрсетілетін болып шешілді. Оның ішінде, отандық танымал «Сырғалым», «Әке серті», «Ұлжан» және «Ағайындылар» туындыларын түрік тіліне дубляж жасауға осы елдегі Қазақстан елшілігі көмек көрсеткелі отыр. «Елдер мен құрлықтарды байланыс­тырушы үлкен құрал – телевизия болып саналады. Түркияның ең ірі мемлекеттік телеарнасы TRT, оның ішінде 8 мемлекетке хабар тарататын, Әзербайжан, Қырғыз, Өзбекстан, Қазақстан секілді бауырлас ел­дердің ұлттық өнерін, дәстүрін, деректі фильмдері мен музыкалық бағдарламаларын көрерменге түрік тілінде ұсынатын TRT-AVAZ (Әуез) телеарнасымен біздің байланысымыз өте тығыз. Соңғы жылдары Қазақстанда түсірілген фильмдерді, телехикая­ларды және балаларға арналған телеөнімдерді Түркия көрермендеріне ұсыну мәсе­лесі оң шешімін тауып келе­ді», – деді Ж.Түймебаев. Осыған дейін де Түркияның басты телеарналарында «Балалық шағымның аспаны», «Жаужүрек мың бала» сияқты туындылар көрсетіліп, түрік көрермендерінің көңілінен шыққаны белгілі. Қазіргі таңда Түркияның әйгілі TRT-AVAZ қазақтың ұлттық спорт түрлерін, оның ішінде, әсі­ресе, көкпарды түркітілдес бауыр­ларымыздың арасында кеңінен насихаттауды қолға алған. Естеріңізге сала кетейік, 2009 жылы алғаш рет хабар тарата бас­таған TRT-AVAZ телеарнасы 2012 жылдан бері қазақ тілінде де хабар тарата бастады. Ол үшін арнайы қазақ редакциясы құрылды. Ол күн сайын көрсетілетін жаңалықтар топтамасын әзірлейді, оған «Қа­зақ­стан» ұлттық арнасының басшылығы да атсалысуда. Рауан ЕСҚАЛИ.