Ақпарат құралдарының қолдауы өте маңызды

Елімізде дағдарысқа қарсы дер уақытында шаралар жүзеге асып жатыр. Елбасының қатысуымен өткен Үкіметтің кеңейтілген мәжілісі жаһанды уысында ұстап отырған дағдарыстан шығудың ішкі мүмкіндіктерін ортаға салды. Негізі, елімізде дағдарысқа қарсы бағдарлама алдымен Елбасы Нұрсұлтан Назарбаевтың «Нұрлы Жол – болашаққа бастар жол» Жолдауы дер едім. Қазақстан бүгінгі әлемде қара дара болып өмір сүре алмайды. Біз әлемдік экономикамен байланысты үзе алмаймыз. Көптеген елдерді қамтып отырған қаржы-экономикалық дағдарыстың салқыны бізді де шарпитыны анық. Сондықтан еліміз қалыптасып отырған жағдайды шынайы қабылдап, оған тиісінше дайын болуы керек. Бұл орайда, біздің Мемлекет басшысы мен Үкімет көреген, кәсіптік деңгейде іс-қимыл жасап отыр. Нұрсұлтан Назарбаевтың саясаткер­лігі біліммен қатар, халық даналығы­нан да сусындауымен ерекшеленеді. Бү­гін тойып отырып, ертеңгіні ойлап қою ­туралы ха­­­­лықтың ескертпе-даналықтары жетерлік. Нұрсұлтан Әбішұлының осы уақытқа дейін жиналған Ұлттық қордан 2015-2017 жылдар арасында жылына 3 миллиард доллар қаржы бөлуге жаса­ған шеші­мі осыны дәлелдейді. Бұл елді дағ­дарыс­тың шырмауына түсірмей, тығы­рықтан шығарар басты жолдың бірі болары сөзсіз. Үкіметтің кеңейтілген мәжілісінде ішкі мүмкіндіктерді пайдалануға зор мән берілді. Үнем мәселесіне көп мән берілуде. Дағдарыс келеді, кетеді. Ал халық қалады. Дағдарыс уақыттың халыққа сыны да секілді. Сондықтан, қиындықтарды жұдырықтай жұмылғанда ғана еңсереміз. Ең алдымен, қазақстан­дық патриотизм солғынданбауы тиіс. Жаңа жұмыс орындарының ашылуы, барын қысқартпай сақтап қалу істің көзін табуға байланысты. Біздің елімізде ондай мүмкіндіктер бар. Қостанайдың өзінен өндіріске де, тұтынуға да қажетті бұйым­­­дар өндіріліп жатыр. Сырттан келетін арзан бұйымдарға жүгірмей, өзімізде өндірілген өнімдерді алу намыстың, патриоттық келбеттің ісі болса, қанекей. Қазақстан­дық кәсіпкерлер де, тұтынушылар да мұны дағдарыстан шығудың жолы деп түсіне­ді деп ойлаймын. Оны бұқаралық ақпа­рат құралдарының қолдауы, әрине, керек әрі көп ықпал етері сөзсіз. Осы орайда, бұқаралық ақпарат құ­ралдары қызметкерлері мен журна­листердің кәсіби біліктілігі зор маңызға ие екені анық. Олар Мемлекет басшысының, Үкіметтің саясатын терең түсінуі керек. Адамдарға ақпарат қалай жетсе, олар солай ойланады, солай жұмыс істейді. Ішкі рухани, материалдық қуаты мықты елден дағдарыс тайғанақтап кетеді. Баспасөз осыған қызмет етуі тиіс. Сергей ХАРЧЕНКО, аймақтық «Костанайские новости» газетінің бас редакторы. ҚОСТАНАЙ.