Қазақстан мен Грузияның сыртқы істер министрліктері арасында кезекті консулдық консультациялар өтті. Бұл жөнінде ҚР СІМ баспасөз қызметі хабарлады.
Кездесу барысында тараптар екіжақты ынтымақтастықтың түрлі аспектілерін талқылады. Оның ішінде Грузияға барған қазақстандық азаматтарды мемлекетке кіргізбеу жағдайларының жиілегені де сөз болды.
«Кездесу барысында қазақстандық тарап соңғы уақытта еліміздің азаматтарына Грузия шекарасынан кіруге рұқсат берілмей, олардың депортациялануы жиілегеніне байланысты алаңдаушылық білдірді. Алайда, елімізден баратын азаматтардың басым бөлігі Грузияға туристік мақсатта барып, қабылдаушы елдің заңын адал сақтайтыны айтылды», делінген СІМ хабарламасында.
Өз кезегінде, Грузия тарапы мамыр айының басынан бастап кіруге тыйым салу жағдайларының едәуір азайғанын атап өтті. Консулдық өкілдер бұл оң үрдіс жалғасын табатынына сендіріп, қазақстандық азаматтардың Грузия аумағына кіруіне барынша қолайлы жағдай жасалатынын айтып өтті.
