8,5 кило героин әкеле жатқан жігіт ұсталды

Үстіміздегі жылдың ақпан айының басында Көлік­тегі ІІД-нің  есірткіге қарсы күрес бас­қармасының қызмет­кер­лерімен жүргізілген жедел іздестіру шаралары барысында Астана бекетінің теміржол вокзалы перронында «Алматы-1-Астана» бағытында келген жолау­шылар пойызынан түскен Алматы облысы, Қаскелең қаласының 28 жастағы тұрғыны ұсталды. Тексеру барысында оның қара түсті жол сөмкесінің ішінен ақ түсті ұнтақты полиэтиленді пакет алынып, тәркіленді. Сараптаманың қорытындысына сәйкес, оның жалпы салмағы 8 кило 446 грамм болатын аса ірі көлемдегі «героин» есірткі заты екендігі анықталды. Тексеру кезінде күдікті есірткі затын Алматы қаласынан Астана қаласына дейін теміржол көлігімен тасымалдау­ды жүзеге асырып, ол үшін ақшалай сыйақы алуы керек болғаны белгілі болды. Сондай-ақ, қосымша жедел іздестіру шараларын жүргізу барысында Алматы қаласында осы есірткі затын жөнелтуші ұсталды. Оларға қылмыстық іс қоз­ғалды, деп хабарлады Көлік­тегі ІІД баспасөз қызметі.