Аймақ үшін маңызы зор ірі кеңсе

Кеше Қазақстан Республикасы Парламенті Сенатының Төрағасы Қасым-Жомарт Тоқаев Дүниежүзілік денсаулық сақтау ұйымы Еуропа өңірлік бюросының директоры Жужанна Якабты қабылдады, деп хабарлады Сенаттың баспасөз қызметі. Жоғарғы палатаның басшысы Алматыда ДДҰ-ға мүше 53 мемлекеттің қызметін үйлестіретін дәрігерлік-санитарлық алғашқы көмек жөніндегі ұйымның «гео­графиялық тұрғыда қашық­тағы» кеңсесін ашу туралы шешімі үшін Ж.Якабқа алғыс айтты, ол Қазақстанның осы беделді халықаралық ұйыммен табысты ынтымақтастығының көрінісі болып отыр. Сенат Төрағасы БҰҰ аясын­дағы денсаулық сақтау сала­сын­дағы халықаралық қызметін, атап айтқанда, жұқпалы Эбола вирусымен күрестегі ДДҰ жетістіктерін атап өтті. Ж.Якаб біздің еліміздегі ден­саулық сақтау саласының дамуы мен негізгі көрсеткіштердің жақ­саруына, «Саламатты Қазақстан» мемлекеттік бағдарламасын іске асыруға, сондай-ақ, балалардың шетінеуін азайту жөніндегі жұмыстарға қанағаттанғандық білдірді. Дүниежүзілік денсаулық сақтау ұйымы Еуропа бюросының өңірлік директорының пікірінше, Алматыда БҰҰ-ның алғашқы ірі кеңсесінің ашылуы Қазақстан үшін ғана емес, тұтастай аймақ үшін ерекше маңызды. «Кеңсенің ашылуы денсаулық сақтау саласындағы және сіздердің ел­деріңіздің көшбасшылығын ны­ғай­туға және Қазақстанның әлемдегі ең дамыған елдердің тобына енуі жөніндегі өршіл мақсатын іске асыруға ықпал етеді», деді өңірлік директор. Қ.Тоқаев Қазақстан халқының денсаулығын жақсартуға бағыт­талған бірлескен күш-жігерді заңнамалық тұрғыда қолдауға Сенаттың әзірлігін білдірді.