Денис Тен «Төрт құрлық турнирінің» жеңімпазы

АСТАНА. 14 ақпан. Денис Тен Оңтүстік Кореяның астанасы Сеулде өткен «Төрт құрлық турнирінде» топ жарып, жарыс жеңімпазы атанды. Бұл туралы egemen.kz хабарлады. Қысқа бағдарламада 97,61 ұпаймен көш бастаған Денис еркін бағдарлама бойынша сайыста да өте жоғары деңгейде өнер көрсетті. Барлық жаттығуын тамаша орындаған қазақстандық спортшы төрешілер тарапынан 191,85 ұпай алып, қос жаттығу қорытындысы бойынша 289,46 ұпайға ие болды. Бұл маусымдағы ең үздік нәтиже екенін айта кетейік. Осылайша, Денис Тен «Төрт құрлық турнирінде» топ жарған алғашқы отандасымыз ретінде Қазақ спортының тарихына қатталды. АҚШ сенім артқан Джошуа Фаррис жарыс барысында 260,01 ұпаймен екінші орын алса, қытайлық Янь Хань қола жүлдеге қол жеткізді. Оның екі бағдарлама бойынша жиған ұпайы 259,47-ге тең. Ал тағы бір отандасымыз Абзал Рахымғалиев 168,10 ұпай жинап, жарысты 20-орынмен аяқтады. Денис Тен енді наурыз айында Қытайдың Шанхай қаласында өтетін әлем чемпионатына қатысады. Еламан Қоңыр. Дерек: egemen.kz. Сурет: 4conti2015.com.