Қызылорданың дзюдошылары Еуропа кубогынан олжалы оралды

ҚЫЗЫЛОРДА. 4 тамыз. Чехия астанасы – Прага қаласында дзюдодан жастар арасында Еуропа кубогы өтті. Аталмыш жарыста Қазақстан спортшылары 6 медаль иеленсе, соның 4-і қызылордалық балуандардың үлесінде. Бұл туралы egemen.kz тілшісі хабарлады. Атап айтсақ, облыстық жоғары спорт шеберлігі мектебінің спортшылары, 55 келі салмақтағы Мағжан Шамшадин мен 60 келіде Жақсыбек Жеңісбек алтын медальға қол жеткізді. Ал 55 келіде Дидар Тәттібай күміс жүлде алды. Сондай-ақ облыстық олимпиадалық резервтің мамандандырылған балалар мен жасөспірімдер мектебінің спортшысы Бауыржан Жауынтаев 60 келіде қола жүлдегер атанды. Бұлардың барлығы да Қазақстан жастар ұлттық құрамасының мүшелері. Дүбірлі додада Қазақстан құрамасы үшінші орынды еншіледі. Бірінші орында – Бразилия, екінші орында – Украина. Биыл қазан айында Біріккен Араб Әмірлігінің Абу-Даби қаласында болатын Әлем чемпионатына Сыр өңірінен осы 4 спортшымен қатар, Еламан Ерғалиев те қатысады. Ержан Байтілес. Дерек: egemen.kz. Сурет: ordainfo.kz.