Өнері – өмірбаяны

    Қарағанды аймағындағы Ақтоғайды ел іші өнер өлкесі ретінде біледі. Қазақи салт-дәстүрдің қаймағы бұзылмаған топырақта екінің бірі әнші, күйші десе болады. Манарбек Ержанов, Күләш Байсейітова сынды жұлдыздар шыққан өңір үрдісі әдемі, бүгінде де талантты ұрпақтармен өз жалғасын тауып келеді. Солардың шоғырлы сапында Аманолла Шайбековтің есімі де көпке танымал. Жақында Әбекең Астанада Ұлы Жеңістің 70 жылдығына орай ардагерлер арасында өткен «Қайран ерлер, қаһарман ардагерлер» атты республикалық байқау фестиваліне қатысты. Сондағы «Менің тағдырымдағы соғыс тақырыбы» номинациясы мүшәйрасында «Ұлы Жеңіс» атты шығармасымен жүлделі екінші орыннан көрініп, лау­реат атанды. Әрине, қандай да жетістіктің ерте-кештігі жоқ болса да алпыстан асқан ақсақалға бұл жеңіс аса ыстық болуын осы хабарды естіген бет­те жүздесуімізде жас балаша шаттық ескен жүрек лүпі­лі­нен, шығармашылық шабыт шал­қыған жүзінен байқаған едік. Ол, міне, қырық жылдан бері ауыл мәдениетін мәуелетуші саналады. Сөзін өзі жазып, әнін өзі шығарушы сан қырлы талант иесінің ел іші өнерпаздары репертуарына берік орныққан әсем әуендері аз емес. Негізгі өзегі отаншылдық, адамгершілік, сүйіспеншілік, рухтық тақы­рыптарға тартылған «Жеңіс», «Мәншүк туралы ән», «Аста­на», «Шаттан, қазақ!» сынды әндері ауыл сахнасынан әрдайым шырқалып жатады. «Ұлылық баспалдағы» атты шығармалар топтамасы Тұңғыш Президент музейінің жеке кітапхана қорында сақтаулы екені әуесқой сазгерге үлкен мерей. Жоғарыдағыдай қырымен қоса, режиссерлік және сценарий жазу машығы қалыптасқан Әбекең «Ақтоғай аудандық мәдени бос уақыт өткізу орта­лығы» КМҚК әдістемелік каби­нет меңгерушісі ретінде бая­ғысынша өлке өмірін қызғы­лықты етудің бел ортасында. Осы саланың жергілікті саңлағының сүйікті қызметіне лайық атақ-дәрежелері де жеткілікті. Өнер дегенде ішкен асын жерге қоятын, өскелең ұрпақ бойына да соны сіңіруге аянбайтын азамат жолы – ел ішіне өнеге. Айқын НЕСІПБАЙ, «Егемен Қазақстан». Қарағанды облысы, Ақтоғай ауданы. Суретте: фестиваль лау­реаты А.Шойбеков және жүлдегер А.Ботбаева.