Асық ойнаған озар

Астанада Ақпарат және байланыс қызметкерлерінің күні мерекесіне орай «Қазконтент» акционерлік қоғамының ұйымдастыруымен БАҚ өкілдерінің арасында асық атудан жарыс өтті. Оған «Егемен Қазақстан» және «Казах­станская правда» респуб­ликалық газеттері, «Орталық ком­му­ни­кациялар қызметі» РМ, «Қазақ­­стан» ұлттық телеарнасы, Бас ре­дакторлар клубы, «Қаз­Ақ­парат» халықаралық ақпарат­тық агенттігі, «Астана» телеарнасы мен «Қаз­контент» акционерлік қоға­мы командасы қатысты. Жарыста ерлер «бес табан» ойнаса, қыздар «бес асық» (бес тас) ойы­ны бойынша сынға түсті. Жал­пы, жарыс өте тартысты, қызықты өтті. Ерлер өзара олимпиялық жүйе бойынша мергендіктерін сынаса, қыздар «бес асықтың» шеберін анықтады. Сөйтіп, екі сағатқа созылған сайыста асық атудан бірінші орынды «Астана» телеарнасы жеңіп алды. Олар финалда «Орталық коммуникациялар қызметі» командасынан басым түсті. Үшінші орынға құрамында осы жолдардың авторы мен Алмас Манапов, Өркен Мұсабек және Ақмарал Кашкова бар «Егемен Қазақстан» командасы ие болды. Қазақ баспасөзінің қара шаңырағы аталып кеткен аға газеттің командасы қола жүлде үшін ойында «Қазақстан» арнасы жі­гіт­терімен кездесіп, жеңіске жетті. Қыздар арасында өткен «Бес асық» ойынында «ҚазАқпарат» агенттігінің журналисі Сая Жарыл­қасын бірінші орынды жеңіп алды. Екінші орынды «Қазконтент» АҚ-тың, үшінші орынды «Қазақстан» телеарнасының өкілдері иеленді. «Асық ату» турниріне «Ерке-Нұр» тобы өнер көрсетіп, жұртшы­лыққа биден шашу шашты. Қазақ­стан Дизайнерлер одағының мүше­сі Айдархан Қалиевтің «ASPARA» сауда белгісі үшін «Ұлы Даланың Қауырсындары» атты жаңа киім үлгі­лері таныстырылды. Ол «нео-фольклор» стилі, көшпенділердің киім тігу өнері мен дәстүрі және «Жаз – 2015» маусымының сән үлгі­сі тенденцияларының негізінде жасалды. Оны «Қазконтент» АҚ-тың түрлi жобаларында қызмет ететiн қыз-келiншектер киiп шығып, сән үлгi­сiн көрсеттi. Жарыс соңында кубок иегері мен жүлдегерлер сыйлықтармен марапатталды. «Асық ату» республикалық фе­­де­­­ра­циясының президенті, «Қаз­кон­­тент» АҚ Басқарма төр­ағасы Айдос Қыдырманың айтуынша, астанада алғаш рет асық атудан жарысты өткізудегі басты мақсат – жас буын арасында ұлттық ойынымызды насихаттау, ұлт­тық спортты дамыту және халықты саламатты өмір салтына шақыру. Қазіргі кезде елімізде асық ойынынан 73 секция бар. «Асық ату» федерациясының атқарушы директоры, ҚР еңбек сіңірген жат­тықтырушысы, «Құрмет» орде­ні­нің иегері Жомарт Сабыр­жан­ов­тың айтуынша, алдағы уақыт­та ­8 обл­ыстан орталықтар ашылады. «Жақында федерация Қостанайда асық атудан Қазақстан чемпионатын өткізеді. Содан кейін Астана күніне орай халықаралық жарыс ұйым­дастырылады. Оған Моң­ғолия, Қырғызстан, Тәжікстан коман­далары қатысады. Бұл елдерде асық ату жақсы дамыған. Моңғолия мен Орталық Азия елдерінде спорт шебері, спорт шебер­лігіне үміткер деген сияқты дәре­желік атақтар, сертификаттар беріледі. Мұндай тәжірибе біздің елге де керек. Алдағы кезде мергендердің дәрежесін арттыру үшін спорттық атақ беру жоспарымызда бар», – дейді ол. Дастан КЕНЖАЛИН, «Егемен Қазақстан».