Әуеледі әсем әуен

Жуырда елорда іргесіндегі Қараөткел кентінде орналасқан 5573-әскери бөлімінде Қазақстан Республикасы Ұлттық ұлан Бас қолбасшысының жүлдесі үшін әскери оркестрлер арасында өткізілетін «Әскери керней» фестивалінің ашылу салтанаты өтті. Бұл мәдени шара биыл төртін­ші мәрте ұйымдастырылып, дәс­түр­лі әрі халықаралық деңгей­дегі фестивальға айналды. Астана әкімдігінің қолдауымен өткен шара – егемен елдің мерейлі асулары – Ұлы Жеңістің 70 жыл­дығына, Қазақ хандығына – 550 жыл толуы мен Ата Заңның 20 жылдық мерейтойларына арналды. Сайысқа еліміздің Ұлттық ұлан өңірлік қолбасшылықтары­ның, Мем­ле­кеттік күзет қызметі­нің, ҰҚК Ше­кара қызметінің, сондай-ақ, Ресей Фе­де­рациясы ІІМ Ішкі әскерлерінің «Солтүстік-Батыс» өңірлік қолбасшы­лығы штабының (Санкт-Петербург) оркестр ұжымдары қатысты. Шара әскери оркестрлердің өнерін жұртшылыққа кең көлемде насихаттауға, өнер ұжымдарының шеберлігін шың­дауға, әскери қызметтің беделін артты­руға бағытталған. Фестиваль аясында 10 әскери ор­кестр ұжымы Ұлттық ұлан Бас қолбасшысының кубогы үшін шығар­машылық өнер­ле­рін ортаға салды. Сонымен қатар, аталған әскери оркес­тр ұжым­дары қаладағы Оқушылар сара­йы­­ның, «Жастар» са­райы­­ның және «Қазақстан» спорт ке­шенінің ал­дындағы алаңдарда түрлі жанр­дағы шығармаларды на­қы­шына келтіре орындап, жұрт­шылықты керемет әсерге бөледі. Шығармашылық байқау соңы сенбі күні «Астана, саған арнаймыз!» атауымен Астана қалалық әкімдігінің ал­дындағы алаңда Гала-концертке ұлас­ты. Музыкалық шараны Қазақстан Республикасы Ұлттық ұланының Бас қолбасшысы, генерал-лейтенант Руслан Жақсылықов ашып, әскери оркестрлердің тартымды өнерін тамашалауға келген елорда тұрғындарын әсерлі кешті бірге бөлісуге шақырды. Сайыстың мәре сынында әр оркестр ұжымы өздерінің кәсіби шеберліктерін, шығарманы үйле­­сімді орындау өнер­лерін, вокал­дық және музыкалық қа­рым­ды қабілеттерін, сонымен қатар, саптық әндерді орындауда көрер­менді тәнті етер шеберліктерін жұрт­шылыққа паш етті. Өнер­паз­­дар ұжымы жиналған қала қо­нақтары мен тұрғындары үшін әр­түрлі музыкалық, атап айтқанда, дефиле, рок, джаз, поп және клас­сикалық музыка­дан шашу шаш­ты. Оның ішінде қазақ ком­пози­тор­ларының да шығармалары болды. Сайыс қорытындысы бойын­ша, Гран-приді Семей қала­сы­нан келген Шығыс өңірлік қол­басшылығына қарасты 5511-әске­ри бөлімнің әскери оркес­трі жеңіп алды. Әсіресе, сайыс­­та Отан қорғаушылар қаруды қол­­данудың түрлі, әсем көрсеті­лімін жасаған кезде жиналған қауым зор ықы­ласпен ду қол шапа­лақтады. Бұл әдіс әскери қызметтің мәртебесін асырып, келер ұрпақтың қарулы күштерге деген қызығушылығын оятса керек. Көкте әуелеген дабыл, дауылпаз, сазсырнай әуені адам жанымен қосыла үндесіп, көпшілікті бір серпілтіп тастады. Раушан ТӘУІРХАНҚЫЗЫ, журналист. АСТАНА.