ӨСКЕМЕН. 17 ақпан. А.С.Пушкин атындағы облыстық кітапхана халықаралық кітап сыйлау күнін атап өтті. «Жақсы көретін кітабымды сізге сыйлаймын!» акциясы аясындағы мерекеде кітапханаға келушілер сыйлыққа кітап алу мүмкіндігіне ие болды. Бұл туралы egemen.kz тілшісі хабарлады.
Аталған шарада оқырмандар өздерінің сүйікті авторлары мен кітаптары жөнінде жан тебірентер пікірлерімен бөлісті. Кітапханаға алдымен қала мектептерінің оқушылары жиналды. Олар «Кітап елі» көңілді-танымдық саяхат ойынына қатысты. Балалар мен ересектер кітаптар мен шығармалар туралы мақал-мәтелдер мен жұмбақтар айтып, түрлі әндер орындады. Сондай-ақ кітапхананың жас достары мәртебелі кітапқа деген өздерінің жүрекжарды жылы лебіздерін арнады. Өзінің сүйікті кітабы жөніндегі ойын шешендікпен жеткізген оқырмандар «Сүйікті кітаптар шеруі» аукционында сыйлық кітаптарға ие болды.
Қабидолла Балтекенов, Надежда Лисьева, Любовь Никкель, Үмітхан Нұрғалиев, Любовь Евстифеева сынды кітапхананың үздік оқырмандары өздерінің кітап оқу ерекшеліктері жөнінде әңгімеледі. Сонымен бірге, қонақтар папирус жазбаларынан бастап, электронды кітапханаға дейінгі уақытты қамтыған «Мәртебелі кітап» зияткерлік ойынына қатысты.
Сонымен қатар, кітапхана оқырмандары облыстық ауруханаға барып, аурухананың қызметкерлері мен емделушілеріне кітап сыйлап, ән айтып берді. «100 қайырымды іс» атты кітапхана жанындағы клуб мүшелерінің назарынан соғыс ардагерлері де тыс қалған жоқ. Майдангер қарт А.Кимусов кітапхананың арнайы сыйлығына ие болды.
Думан Анаш.
Дерек: egemen.kz
Сурет: А.Пушкин атындағы облыстық кітапхана.
