Қарыз алып... қашып жүр

«Қарыз күліп барып, жылап қайтады» дейді халық даналығы. Соңғы кездері банк­терден несие алып, мезгілінде қайтар­майтындардың «Алаған қолым, береген» дегенді қаперден шығарып алуы жиі кездесуде. Сондықтан жолаушылар автобустарындағы монитор­лардан банктерге қарызы бар ақтөбелік­тердің фотосуреттері көрсетіле бастады. Арала­рында ұл-қыздарына алимент төлеу­ден бас сауғалап жүрген қашақ әкелер де бар. Облыстық әділет департаменті баспасөз қызметінің маманы Алиса Ама­нованың хабарлауынша, қала аума­ғында жолаушы тасымалдайтын автобус­тарда борышкерлердің аты-жөні ғана емес, фотосуреттерін де көрсетуге барудағы мақсат – олардың ұятын ояту болмақ. Борышкерлердің жалпы саны 15 адам. Олардың барлығы банктерден несие алып, өтеуден жалтарып жүрген көрінеді. Борышкерлер еш жерде жұмыс істемейді және несие рәсімдеген кездегі мекен-жайларынан қоныс аударған, қазір тұратын мекен-жайлары белгісіз. Сондықтан, сот орындаушылары қолда­рында бар ақпаратты автобустарда таратып, борышкерлерді осылай ұялтуды шешкен. Банкке қарыз ақтөбеліктердің көшін Ақтамақ Көптілеуова есімді азаматша бастап тұр. Оның банк алдындағы қарызы 1 миллион теңгеден асқан. Қазір облыста ел аумағынан шығуға уақытша шектеу қойылған 12 394 борышкердің жалпы қарызы 30 660 286 699 теңгені құрайды екен. Сатыбалды СӘУІРБАЙ, «Егемен Қазақстан». Ақтөбе облысы.