Интеграцияның ізгі жолындағы игі істер

Орталық коммуникациялар қызметінде «KTZ Express» АҚ президенті  Санжар Елубаев пен «ҚТЖ» ҰК» АҚ филиалы – Көліктік-логистикалық даму орталығы» директорының орынбасары Абдур-Рашид Сәкенов баспасөз мәслихатын өткізді. Онда Қазақстанның халықаралық көлік ағындарына ықпалдасу шаралары сөз болды. Бұл тұрғыда «KTZ Ex­press» АҚ Қазақстанның халық­аралық көлік ағынына ықпал­дасуы мақсатында ішкі және сырт­қы терминалдық желі­сі­мен кең ауқымды жобаларына кіріскені мәлім. Осы жөнінде әңгіме өрбіткен спикерлер «Нұр­лы Жол» мемлекеттік бағ­дар­ла­масына сәйкес, еліміз аума­ғындағы транзиттік дәліз­дер­ге жүк ағынын тарту қызметі рес­публика ішіндегі терминалдық желіні сәулелі әдіспен дамытуды көздейтінін жеткізді. Осы тапсырманы орындау мақсатында биыл бірқатар жобалар орындалыпты. Мәселен, Астана мен Шымкент қалаларындағы А класындағы көліктік-логистикалық орта­лықтар пайдалануға беруге дайын болыпты. Сондай-ақ, «Қорғас – Шығыс қақпасы» АЭА инфрақұрылымдық нысандары жұмысын бастаған. Ақтау халықаралық теңіз пор­ты­ның солтүстік қанатын ке­ңей­ту жобасы аяқталғалы тұр екен. Компания оның сыртында халықаралық нарықтағы көлік­тік-логистикалық қызмет аясын өсіре түскен. Ал Ляньюнган (ҚХР) портында бірлескен Қазақ­стан-Қытай терминалы табысты жұмысын жалғастырып жатқан көрінеді.  Бүгінде «KTZ Express» АҚ Клайпеда (Литва), Бандер-Аббас (Иран) және Бомбей (Индия) порттарының терминалдарына қатысуды жоспарлап қойыпты. Бұлармен қатар компания пре­зиденті Қытай, Ресей, Түркия, Иран, Индия және Балтық жағалауы, Таяу Шығыс, Еуропа нарығына шығу жос­парлары жөнінде әңгімеледі. Сөйтіп, тәуелсіздік жылдарында Қазақстан бұрынғы КСРО елдерімен салыстырғанда, теміржол құрылысын бірнеше есе артық жүзеге асырғанын қадап айтты. «Соңғы бес жылда контейнерлік тасымалдардың кө­лемі 15 есеге артты. Биыл біз тағы да екі есеге арттыруды жос­парлап отырмыз. Атап айт­қан­да, әлеуетіміз өте үлкен. Осы орайда біздің логистикалық инфрақұрылымды белсенді түрде пайдаланатын боламыз. Тағы бір жағымды жаңалығымыз, Ақтау халықаралық теңіз портын солтүстік бағытта кеңейту жобасы аяқталуға жақындады. Бұл өз кезегінде құрғақ жүктердің тасымалын 4 есеге арттыруға мүмкіндік береді. Ал «Қорғас – Шығыс қақпасы» АЭА құрғақ порты стратегиялық маңызға ие екені баршаңызға мәлім», деп түйіндеді ол сөзін. Астана әуежайында ұшу-қону алаңын қайта жарақ­тандыру мен жаңа терминал құрылысын жүзеге асыру жос­парланып отырғанын ҚТЖ өкі­лі жеткізді. «Бұл жобаның аяқталу мерзімі 2017 жылдың наурызына белгіленіп отыр. 2015 жылы темір құймалардың басты қаңқалары орнатылады. Қазіргі кезде дайындық жұмыстары жүріп жатыр. Жобаның бас­ты мақсаты, әуежайдан өтетін жолаушылардың санын сағатына 750 адамнан 2500-ге дейін арттыру. Сапарлайтын адамдардың санын жылына 3,5 миллионнан 7 миллионға дейін жеткізу көзделіп отыр. Жоба іске қосылғаннан кейін 400 адамға жұмыс орны ашылады. Құрылысқа 1 мыңнан астам жұмысшы тартылады. Басты назар аударарлығы, ­ұшу-қону алаңы қазіргі заман­ғы талаптарға сәйкес жоғары стандарттармен салынады. Осы орай­да әуежай ауа райы жағ­да­йы­на қарамас­тан, ұшақ­тарды қабыл­дау­­ға қауқарлы болады», ­ – деді А.Сәкенов. Нұрбай ЕЛМҰРАТОВ, «Егемен Қазақстан».