Бастама халықаралық Түркі академиясында талқыланды

Елбасы Н.Назарбаев Түркияның Бодрум қаласында 2014 жылғы 5 маусымда өткен Түркі кеңесінің ІV саммитінде түркі әлемінің ортақ ақпараттық кеңістігін қалыптастыру және ортақ телеарна құру жөнінде бастама көтерген болатын. Бұл ұсыныс тараптардың қолдауына ие болып, қазір кең талқылаудың тақырыбына айналды. Осыған орай халықаралық Түркі академиясы журналистердің кәсіби мерекесі – Байланыс және ақпарат қызметкерлерінің күні қарсаңында Бейбітшілік және келісім сарайында «Түркі әлемі және ақпараттық кеңістік» атты дөңгелек үстел өткізді.  Алқалы жиынға Қазақстандағы жетекші бұқаралық ақпарат құ­рал­дарының басшылары, жоғары оқу орындарының оқытушылары мен журналистер қауымы қатысып, ой бөлісіп, пайымды пікірлерін ортаға салды. Айта кету керек, биыл Астанада өтетін Түркі кеңесін құрушы ел­дер­дің саммитінде аталған мәселе қарас­тырылады деп күтілуде. Осыған орай дөңгелек үстелде айтылған ұсыныс, пікірлерді халықаралық Түркі академиясы жинақтап, Түркі кеңесінің назарына ұсынбақ. Түбі бір туыс халықтардың мә­дени-рухани интеграциясы мәсе­ле­леріне арналған басқосу барысында түркі әлемінің ақпарат кеңістігіне еңбегі сіңген бірқатар бұқаралық ақпарат құралдарының басшылары марапатталды. Атап айтсақ, Түркі дүниесінің білім, ғылым саласындағы жетістіктерін насихаттауға және түбі бір туыс халықтар арасындағы ынтымақтастықты дамытуға қосқан зор үлестері үшін «Үздік баспасөз жарияланымы» аталымы бойынша «Егемен Қазақстан» республикалық газеті» АҚ президенті Сауытбек Абдрахманов, «Үздік телерадио материалдары» аталымы бойынша «Қазақстан» РТРК» АҚ басқарма төр­айы­мы Нұржан Мұхамеджанова, «Үз­дік ақпарат агенттігі материалдары» аталымы бойынша «Қазконтент» АҚ басқарма төрағасы Айдос Қыдырма халықаралық Түркі академиясының Алғыс хатымен, сондай-ақ, Түркі дүниесінің білім мен ғылым саласына және түбі бір туыс халықтар арасындағы мәдени-рухани байланыстарды нығайтуға  қосқан өлшеусіз үлесі үшін Намазалы Омашев Құрмет грамотасымен марапатталды. Сонымен бірге, халықаралық Түркі академиясының президенті Дархан Қыдырәлі  марапатталғандардың барлығына академияға мүшелігін білдіретін төсбелгілерді табыстады. Сонымен қатар, халықаралық Түр­кі академиясы БАҚ саласы бойын­ша арнайы сыйлық жариялайты­нын жеткізді. Жыл сайын 8 қыр­күйекте – халықаралық Журна­листер ынтымақтастығы күніне та­быс етілетін бұл сыйлық түркі ха­лық­тарының білім және ғылым са­ла­сындағы жетістіктерін насихаттауға, сондай-ақ, тарихи тамырлас елдер арасындағы ынтымақтастықты арттыруға ерекше үлес қосып жүрген БАҚ өкілдеріне беріледі. Оған Қазақстаннан бөлек түркітілдес мемлекеттердің журналистері де үміткер ретінде қатыса алады. Берік САДЫР, «Егемен Қазақстан».