Өскеменде қар тазалауға 127 техника мен 140 адам тартылды

ӨСКЕМЕН. 19 ақпан. Шығыс өңірінде соңғы күндері ауа райы қайта суытып, қар жаууына байланысты, облыс орталығында көшелерді қардан тазалау жұмыстары күшейтілді. Бұл туралы egemen.kz тілшісі хабарлады. Өскемен қаласында бейсенбіден жұмаға қараған түні 127, күндіз 85 техника көшедегі қарды тазалауға жұмылдырылды. 140 жұмысшы жаяу жүргінші жолдары мен аялдамаларды және қар тазалау техникаларының қызметіне қиындық тудыратын орындарды күрекпен тазалады. Алдымен қаланың орталық көшелері қардан аршылды. Көшеде көлік кептелісін тудырмау үшін негізгі техника күші түндегі жұмыс кестесіне көшірілді. Қазіргі кезде қар тазалау жұмыстары жалғасуда. Жүргізілген жұмыстардың нәтижесінде, көшеде көлік қозғалысы қалыпты жағдайға келтірілді. Думан Анаш. Дерек: egemen.kz. Сурет: Өскемен қаласы әкімдігінің баспасөз қызметі.