Халықаралық «Болашақ» бағдарламасының стипендиаттары мерзімінен бұрын президенттік сайлау өткізуді қолдайды
Қазақстан үшін адами капиталды дамыту және бәсекеге қабілетті интеллектуалды әлеуетті қалыптастыру жолындағы стратегиялық жобалардың бірі – Қазақстан Республикасы Президентінің халықаралық «Болашақ» стипендиясы. Мемлекет басшысының көреген саясатының арқасында мыңдаған қазақстандық әлемнің жетекші жоғары оқу орындарында білім алды, армандарына қол жеткізді, кәсіби тұрғыда өсіп-өніп, білімі мен тәжірибесіне сүйене Қазақстанның әлеуметтік-экономикалық өсіп-өркендеуіне үлес қосты.
Бүгінгі күні сол «болашақтықтар» әлемнің әр қиырынан Елбасының «Нұрлы Жол – болашаққа бастар жол» Жолдауында жазылған еліміздің жан-жақты даму бағытына қолдау көрсетіп, Қазақстан халқы Ассамблеясының кезектен тыс президенттік сайлау өткізу туралы бастамасын құптайды.
Мен – «Болашақ» халықаралық стипендиясы бойынша Қытай мемлекетінің телекоммуникация саласында білім алып жүрген стипендиатпын. Жақын болашақта екі елдің арасындағы қарым-қатынасты одан әрі нығайтуда, сол елдің өзінде білім алып, өмір сүрген біздердің тәжірибеміз әрқайсымызға сай салада сұраныс табады деген сенімдемін.
Бүгінде Қытай мемлекетінің жоғары оқу орындарында білім алған, стратегиялық серіктесіміздің тілі мен менталитетін меңгерген мамандар – экономикамыздың көптеген саласында маңызға ие. Қытайлық үздік білімі бар түлектердің тәжірибесі энергетика, сауда-экономикалық байланыс, жаңа жоғары технологиялар пайдаланылатын кәсіпорындарда да пайдалы болмақ.
Сонымен қатар, мұнай-химия өндірісі, машина жасау және басқа да шикізаттық емес салаларда екіжақты қызығушылық бар, ауыл шаруашылығы, жаңа технологиялар, мәдени-гуманитарлық және білім беру салаларындағы қарым-қатынас та қарышты дамып келеді. Мұның барлығы еліміздің бейбіт сыртқы саясатының, екіжақты қарым-қатынас теңдігінің және Елбасының жеке беделінің арқасы деп білемін.
Саяси бағдары айқын «Мәңгілік Ел» ұлттық идеясын ұсынып, оны жүзеге асыру жолында қажырлы еңбек етіп келе жатқан Елбасына елдің сенімі қашанда жоғары. Сондықтан да еліміздің болашағы үшін жауапты сәт – кезектен тыс президенттік сайлау өткізу бастамасын құптаймын.
Тілектес АДАМБЕКОВ,
халықаралық «Болашақ» стипендиясының иегері, Tongji University, ҚХР.
Болашақтықтар әлемдік еңбек нарығында бәсеке тудыра алатындай білім алды. Бүгінде ел артқан үмітті ақтар уақыт келді, алған білім мен жинаған тәжірибені пайдаланып, Қазақстанның әл-ауқатын көтеру туын қолға алу ел халқының парызы деп білемін.
Біз, «Болашақ» бағдарламасының түлектері, бүгінгі әлемде қалыптасқан күрделі экономикалық жағдай мен геосаяси үдерістерді ескере отырып, Қазақстан халқы Ассамблеясы Кеңесінің ұсынысын қолдаймыз.
Аталған қиын-қыстау кезеңде ел тағдырын жоғары тәуекелге бой алдырмай, кезектен тыс президенттік сайлауды биыл өткізу бастамасын ұтымды деп есептейміз. Бұл шара қоғамда бірлік пен ынтымақтың артуына өз септігін тигізері сөзсіз.
Елбасы ұсынған «Нұрлы Жол» бағдарламасы мемлекетімізді бұл дүрбелең кезеңнен қиындықсыз алып шығатыны анық. Бағдарламаны орындауға «Болашақ» түлектері де 100% дайын.
Мүтәлі ӘБУТӘЛІП,
«Болашақ» бағдарламасының түлегі, Pennsylvania State University, АҚШ, «Инвесторлар Альянсы» ҚБ директоры.
Елбасының бастамасымен қолға алынған «Болашақ» бағдарламасы қазақ жастарының шетелдердегі озық оқу орындарынан білім алып, жан-жақты жетілуіне мүмкіндік берді. Қазақстан жастарының дамыған елдердің азаматтарымен теңесіп, білімді де білікті болуы – Қазақ елінің ғылыми-техникасы дамыған, бай да қуатты елдердің қатарына қосылу жолындағы алғашқы қадамы. «Болашақ» бағдарламасының түлектері бүгінгі күнде еліміздің дамуында стратегиялық маңыз алатын түрлі секторларда еңбек етуде, ел дамуына өз үлестерін қосуда.
«Болашақ» бағдарламасының 20 жылдан астам уақыт табысты жүргізілуі еліміздің саяси жағдайының тұрақтылығының және экономикасының қарыштап дамуының арқасы.
Жақында көтерілген президенттік сайлауды кезектен тыс өткізу бастамасы қазір орын алып отырған халқаралық геосаяси жағдайға және кейбір елдерде белең берген экономикалық тоқырауға байланысты екендігі белгілі. Еліміздің саяси және экономикалық орнықтылығы үшін, қазір қолға алынып отырған мемлекеттік бағдарламалардың сәтті жалғасуы үшін «Болашақ» бағдарламасының түлегі ретінде, мен президенттік сайлаудың мерзімінен бұрын өтуін қолдаймын.
Айқын АСҚАПҰЛЫ,
«Болашақ» бағдарламасының түлегі, Pennsylvania State University, АҚШ, «Назарбаев Университет» ДББҰ-ның ғылыми қызметкері.
Сыртқы факторлардың әсерінен қиындықтар фазасына аяқ басып жатсақ та, бюджетті миллиардтаған теңгеге оңтайландыру шараларын қабылдауға тура келсе де, Президентіміз жастарға, олардың білім алу құндылығына деген қамқорлығын төмендеткен жоқ.
Жақында ғана өткен Үкіметтің кеңейтілген жиынында Мемлекет басшысы қандай қиындық болса да білім беру мен денсаулық сақтау салаларын дамыту ісін жүргізе беретіндігімізді шегелеп көрсетті. «Бұл – адам капиталына салынған ұзақ мерзімді инвестиция және ол болашақтағы экономикалық дамуға негіз болады», деді Президент. Расында да, 90-жылдардың қалыптасу кезеңінде-ақ басталған болашақ перспективалар үшін білікті, сапалы кадрларды шетелдердің озық білім ордаларында дайындау стратегиясы үзіліссіз, үздіксіз қазіргі күнге дейін жалғасын тауып келеді.
Өткен жылдың соңында мен де «Болашақ» бағдарламасының стипендиаты атандым. «Болашақ» бағдарламасы көптеген жастардың өмірлік даңғыл жолын айқындап берді. Жас буынның азамат ретінде, тұлға ретінде қалыптасуына ықпал етті. Ертеңге үміттерін оятты. Мен үшін де осы халықаралық «Болашақ» стипендиясы аясында білім алу – үлкен мәртебе.
Қазақстан халқы Ассамблеясы Кеңесінің мерзімінен бұрын президенттік сайлау өткізу туралы көтерген бастамасы партиялар, қоғамдық бірлестіктер, қауымдастықтар мен беделді тұлғалар тарапынан қолдау тауып жатыр. Тарих өзі бағасын беретін қазіргідей бейбіт күннің қадірін, тәуелсіздікпен бірге елімізді лайықты басқарып, тыныштық пен берекеге ұйытқы болып келе жатқан Мемлекет басшысы Нұрсұлтан Әбішұлы Назарбаевтың бастамаларына қолдау білдіруге әзірмін.
Рахат ЖАҚСЫБАЙ,
«Болашақ» бағдарламасының стипендиаты, «Хабар» агенттігі АҚ бағдарламалар өндірісі дирекциясы арнайы жобалар қызметінің жетекшісі.
