Уақыт талабынан туындаған бастама

Сенат Елбасы Н.Ә.Назарбаевқа кезектен тыс президенттік сайлауды тағайындау туралы мәселені қарауды өтінген үндеу қабылдады

Кеше Қасым-Жомарт Тоқаевтың төрағалық етуімен Парламент Сенатының отырысы болып, онда палата Қазақстан халқы Ассамблеясы Кеңесінің мерзімінен бұрын президенттік сайлауды өткізу туралы бастамасын бірауыздан қолдады және Қазақстан Республикасының Президенті, Елбасы Н.Ә.Назарбаевқа сайлауды тағайындау туралы мәселені қарауды өтінген Сенат үндеуін қабылдады. Үндеуді оқыған жоғары палатаның басшысы уақыт талабынан туындап отырған бастама барша халықтың қызу қолдауына ие болып, Қазақстан қоғамында оң пікірлер туғызғанын атап өтті. Сенат Төрағасының пікірінше, халықаралық ахуал шиеленіскен, әлемде қақтығысты жағдайлар туындаған және жаһандық экономикадағы дағдарыстық құбылулар орын алып отырған уақытта ішкі саяси тұрақтылық қамтамасыз етіліп, әлемнің ең дамыған елдерінің тобына кіру мақсатын көздейтін ұзақ мерзімді «Қазақстан-2050» Стратегиясын, «Мәңгілік Ел» тұжырымдамасын, «Нұрлы Жол» бағдарламасын табысты іске асыру үшін қолайлы жағдайлар жасалуы тиіс. Сенаторлар үндеуінде Елбасының дана және мықты көшбасшылығының арқасында Қазақстан халқы еліміздің қалыптасуы мен дамуындағы барлық қиындықтарды абыроймен еңсергені айтылды: «Сіз тәуелсіздік жылдарында дамыған нарықтық экономикасы, халықаралық қоғамдастықтағы беделді ұстанымдары бар табысты мемлекет құра білдіңіз. Сондықтан да, қазақ­стан­дықтардың бүгінгі таңдағы бар­лық жетістіктерін: тұрақ­ты эко­номикалық өсуді, демократияның дамуын, ұлтаралық келісім мен әлеуметтік игілігін Сіздің есі­міңізбен байланыстыруы заңды», делінген үндеуде. Жоғары палатаның басшысы Қазақстан өз дамуының жаңа сатысына аяқ басқанын атап өтті. Осы орайда, деді ол, белгіленген реформаларды одан әрі жүргізуге бағытталған Елбасының бағдарын табысты жүзеге асырудың сөз­сіз шарты болып табылатын тұрақтылықтың маңызы зор. «Біз, Парламент Сенатының депутаттары, кезектен тыс президенттік сайлау өткізу елімізде бейбітшілікті, бірлік пен келісімді нығайтуға ықпал ететіндігіне сенімдіміз», – деді Қ.Тоқаев. Сенаторлар М.Алтынбаев, М.Бортник, Г.Ким, Е.Сағындықов, Б.Бекназаров Қазақстан халқы Ассамблеясы Кеңесінің бастамасын қолдап, сөз сөйледі. Отырыс барысында сенаторлар Қазақстан мен Өзбекстан Үкіметтері арасындағы Адам­дар­дың реадмиссиясы туралы келі­сімді және осы келісімді іске асыру тәртібі туралы Атқару хат­тамасын ратификациялады. Келісім екі мемлекеттің аумағына келу, онда болу немесе тұру шарттарын орындамайтын немесе орындауды тоқтатқан адамдарды анықтаудың және қауіпсіз әрі ретімен қайтарудың тиімді рәсімдерін айқындайды, сондай-ақ, осындай адамдардың транзитіне ықпалын тигізетін болады. Палата Кеден одағына мүше мемлекеттер болып табылмайтын, Тәуелсіз Мемлекеттер Дос­тас­тығына қатысушы мемлекет­термен өзара саудадағы техни­калық кедергілерді жою туралы Кеден одағына мүше мемле­кет­тердің келісімін ратифи­ка­циялады. Құжатты қабыл­дау сауда-экономикалық ынты­мақ­тастықтың тиімділігін арттыруға, инвестициялық өзара іс-қимыл­ды кеңейтуге, өзара сауда көле­мін ұлғайтуға және тұрақты эко­номикалық өсімді қолдауға жағдай жасайтын болады. Сенаторлар «Балаларды ден­саулығы мен дамуына зардабын тигізетін ақпараттан қорғау туралы» заңды қабылдады. Заң жобасының негізгі мақсаты бала­ларды зиянды ақпараттан қор­ғауды, балалардың өз жасына лайық ақпаратты алуға және таратуға құқықтарын іске асыруды, сондай-ақ, олардың ақпарат кеңістігіне жағымсыз ақпараттың енуінен қорғауды қамтамасыз ету болып табылады. Құжатта ақпарат өнімдерінің сараптама жүргізу тетіктері бекітілді, сарапшыларға қойылатын талаптар, сарапшылар мен сараптама ұйымдарын тіркеу тәртібі белгіленді, осы са­ланы реттейтін мемлекеттік орган­дардың құзыреттері ажыратылды. Палата ілеспе заң жобасын екі оқылымда қарағаннан кейін оны да қабылдады. Қолданыстағы заңнаманың құ­қықтық олқылықтарын жою, ден­саулық сақтау жүйесін одан әрі жетілдіру, сондай-ақ, аза­мат­тардың толыққанды медици­налық қамтылуына консти­ту­ция­лық құқықтарын қамтамасыз етуді көздейтін «Қазақстан Респуб­ликасының кейбір заңнамалық акті­леріне денсаулық сақтау мәсе­ле­лері бойынша өзгерістер мен толық­тырулар енгізу туралы» заң жо­басы бірінші оқылымда қарал­ды. Заң жобасы бірқатар заңна­малық актілерге өзгерістер мен то­лықтырулар енгізуді көздейді. Депутаттар «Қазақстан Рес­публикасының кейбір заң­на­малық актілеріне зияткерлік меншік саласын құқықтық реттеу мәселелері бойынша өзгерістер мен то­лық­тырулар енгізу туралы» заң жобасын екінші оқылымда қарап, регламентке сәйкес түзетулерімен Мәжіліске жіберді. Асқар ТҰРАПБАЙҰЛЫ, «Егемен Қазақстан».